Բարձրագույն դատական խորհրդի նախագահ Ռուբեն Վարդազարյանն այսօր Երեւան քաղաքի առաջին ատյանի ընդհանուր իրավասության դատարանի դատավորների հետ հանդիպման ժամանակ հայտնեց, որ այս տարի ամբողջությամբ փոխվելու են դատական համակարգի համակարգիչները՝ դատարանների աշխատանքը բարելավելու նպատակով:
Դատավորներին էլ հորդորեց խնդիրների մասին առանց կաշկանդվելու բարձրաձայնել: Նա նաեւ ասաց, որ պայմանավորվածություն ունեն եւ շուտով գործարկելու են՝ դատավորների սեփական մեքենաներին տրամադրվելու է դատական համակարգի պետհամարանիշներ, որը կամավոր է, ով կուզի, կփոխի. «Մեր համոզմամբ, սա երկու հարց է լուծում։ Առաջին՝ հասարակությունը տեսնում է, որ մեքենայի ղեկին դատավոր է, վերաբերմունք է փոխվում այդ մեքենայի հանդեպ։
Դատավորները կգտնվեն հանրային հսկողության տակ. որեւէ դատավոր, որը կկատարի ճանապարհային երթեւեկության խախտում, կթիրախավորվի, որեւէ մեքենա, որը կհայտնվի գիշերային ակումբի կամ խաղատան առջեւ, նույնպես կթիրախավորվի»,- ասաց Ռուբեն Վարդազարյանը։
Լուսինե ԲՈՒԴԱՂՅԱՆ
