Այսօր ՀՀ քննչական կոմիտեի ՀԿԳ քննության գլխավոր վարչության քննիչի կողմից ՀՀ ոստիկանության նախկին պետ, պաշտոնաթող գեներալ-գնդապետ Վլադիմիր Սերգեյի Գասպարյանին մեղադրանք է առաջադրվել ՀՀ քրեական օրենսգրքի 375 հոդվածի 2-րդ մասով: Վ.Գասպարյանը առաջադրված մեղադրանքում իրեն մեղավոր չի ճանաչել և հրաժարվել է քննության այս փուլում ցուցմունքներ տալուց: Վ.Գասպարյանը առաջադրված մեղադրանքին լուրջ չի վերաբերվում, քանի որ այն զավեշտի աստիճանի ակնհայտ անհիմն է և, բացի այդ սա արդեն 5-րդ թե 6-րդ քրեական գործն է, որը կապվում է իր անվան հետ իր պաշտոնից ազատվելուց հետո: Այդ քրեական գործերից մի քանիսի վարույթը արդեն կարճվել է նախաքննության փուլում, համոզված ենք, որ այս գործը ևս չունի որևէ իրավական ապագա և կարճվելու է:
Գեներալ-գնդապետ Վ.Գասպարյանը իր ողջ կյանքը նվիրել է Հայոց պետականության կայացմանը, հավատարիմ է իր այդ նվիրումին նաև հիմա, իսկ ինչ վերաբերում է տեղի ունեցող քրեական գործընթացներին, ապա դրանք դիտարկում է երկրում տիրող իրավական նիհիլիզմի ընդհանուր համայնապատկերի մեջ:
Տիգրան ԱԹԱՆԵՍՅԱՆ
փաստաբան, Վ. Գասպարյանի պաշտպան
Հ. Գ. Քննչական կոմիտեի խոսնակ Նաիրա Հարությունյանը «Ազատությանը» փոխանցեց, որ թեև Գասպարյանը հրաժարվում է ցուցմունք տալ, սակայն խոստացել է մինչև օրվա ավարտը Քննչական կոմիտեի հաշվին վճարել պետությանը պատճառած առանձնապես խոշոր չափերով՝ մոտ 22 միլիոն դրամի վնասը:
Կարդացեք նաև
Լրացում. Ավելի ուշ Տիգրան Աթանեսյանը մեկ այլ գրառում կատարեց. «Որոշ «ազատ» լրատվամիջոցների կողմից տարածվել է տեղեկատվություն, թե իբր Վլադիմիր Գասպարյանի կողմից կատարվել է հանցագործությամբ պատճառված վնասի հատուցում։ Հայտնում եմ, որ դա սուտ է, Վ.Գասպարյանը չի ընդունում իրեն առաջադրված մեղադրանքը, հետևաբար և որևէ պատճառված վնաս։ Իմ տեղեկություններով, վնասը վաղուց հատուցվել է այն ենթադրաբար պատճառած այլ անձանց կողմից»:
