Aravot.am-ի տեղեկություններով, «Հյուսիս-Հարավ ճանապարհային միջանցք» ծրագրի քրեական գործով այսօր մեղադրանք առաջադրվեց նաեւ ԲՀԿ առաջնորդ Գագիկ Ծառուկյանին պատկանող «Մուլտի գրուպ կոնցեռնի» տնօրեն, Ծառուկյանի ընկեր Սեդրակ Առուստամյանին:
Հիշեցնենք, որ «Հյուսիս-հարավ» ավտոճանապարհի շինարարությունը մեկնարկել է 2012-ին, այն այս տարի արդեն պետք է ավարտված լիներ։ Ավարտին, սակայն, դեռ շատ կա:
Ավելի վաղ գլխավոր դատախազությունը հայտնել էր, որ «Հյուսիս-հարավ ճանապարհային միջանցք» ծրագրի իրականացման ընթացքում պաշտոնատար անձանց կողմից առերևույթ հանցավոր արարքներ, չարաշահումներ կատարելու վերաբերյալ հարուցված քրեական գործի նախաքննությամբ արդեն իսկ ձեռք բերված փաստական տվյալներով պարզվել են ծրագրում ընդգրկված բազմաթիվ ընկերությունների միջև տարատեսակ ձևական, «անապրանք» գործարքների կնքման, փաստաթղթերի կեղծման, հափշտակությունների, հարկերի վճարումից չարամտորեն խուսափելու բազմաթիվ դրվագներ:
Հիշեցնենք նաեւ, որ Սեդրակ Առուստամյանի դուստրը՝ Նորա Առուստամյանը, ԲՀԿ խմբակցության պատգամավոր է:
