Այս պահին ՊՆ նախարար Դավիթ Տոնոյանը ԱԺ մարդու իրավունքների պաշտպանության հանձնաժողովում փակ հանդիպման է: Մինչ այդ նա լրագրողների հետ ունեցած ճեպազրույցում անդրադառնալով իր հրաժարականի մասին լուրերին՝ ասաց, որ ինչպես տեսնում եք, այդ լուրերը արդարացված չեն, չկա այդպիսի բան: Նա վստահեցրեց, որ վարչապետի հետ նման խոսակցություն անգամ չի եղել:
Հարցին՝ ինչպե՞ս կմեկնաբանեք ԱԱԾ տնօրեն Արթուր Վանեցյանի հրաժարականը՝ Տոնոյանը պատասխանեց. «Չեմ կարող մեկնաբանել, որովհետեւ դա իր անհատական որոշումն է եղել»: Հրաժարականի տեքստի առնչությամբ Տոնոյանը նույնպես որեւէ մեկնաբանություն չուներ. «Կարծում եմ, Վանեցյանը ժամանակին դա կանի»:
Դիտարկմանը, որ տեսակետ կա, թե տարաձայնությունների պատճառով է եղել հրաժարականը՝ ՊՆ նախարարը պատասխանեց, որ առանց որեւիցե պատճառի հրաժարական չի լինում: Նա ասաց, որ Վանեցյանն իր ընկերն է, սերտ համագործակցել են ու բոլոր մեկնաբանությունները կթողնի իրեն. «Ես պաշտպանական քաղաքականության համար անմիջապես պատասխանատու եմ»:
Դավիթ Տոնոյանը հերքեց, որ Անվտանգության խորհրդում ոստիկանապետ Վալերի Օսիպյանի հետ որեւէ խոսակցություն է եղել իր հրաժարականի մասին: Նա վստահեցրեց, որ շատ ներդաշնակ աշխատանք են տանում կառավարությունում:
Կարդացեք նաև
Տոնոյանը նաեւ ասաց, որ ՊՆ-ում գլխավոր շտաբի պետի կամ այլ պաշտոններում պաշտոնանկություններ չեն սպասվում:
Նա ասաց, որ ապրիլյան դեպքերը քննող հանձնաժողովն իր աշխատանքները կավարտի, նոր կտեսնեն. «Հանձնաժողովի աշխատանքն այս պահին արդյունավետ է, այն տեղեկությունները, որ իրենք ստանում են, կարծում եմ, բավարար են լինելու եզրակացություններ անելու համար»: Հարցին՝ ցավոտ անակնկալներ լինելո՞ւ են՝ նա պատասխանեց. «Ցավոտ՝ ոչ: Մտահոգիչ փաստերի վերաբերյալ նախաքննության մարմինները մեծածավալ աշխատանքներ են կատարել: Հանձնաժողովն իր աշխատանքները չի անում, որ անպայման քրեական գործ հարուցվի: Տրամադրություններդ բարձր, ամեն ինչ նորմալ է»:
Հռիփսիմե ՋԵԲԵՋՅԱՆ
