Բաքուն չի դիտարկում ՀԱՊԿ-ում դիտորդի կարգավիճակ ստանալու հարցը: Ինչպես հաղորդում է Interfax-ի ադրբեջանական ծառայությունը, այս մասին հայտարարել է Ադրբեջանի նախագահի աշխատակազմի արտաքին քաղաքականության վարչության ղեկավար Հիքմեթ Հաջիևը RealTV-ին տված հարցազրույցում:
«Ադրբեջանն այս պահին չի դիտարկում մասնակցությունը ՀԱՊԿ-ին որևէ ձևաչափով, այդ թվում՝ դիտորդի կարգավիճակով»,-ասել է նա:
Հաջիևը ընդգծել է, որ անհրաժեշտ է հաշվի առնել այն հանգամանքը, որ «Ադրբեջանը սերտ բարեկամական և գործընկերային հարաբերություններ ունի ՀԱՊԿ անդամ բոլոր երկրների հետ, բացառությամբ՝ Հայաստանի»: Նա միևնույն ժամանակ նշել է, որ «Ադրբեջանը ուշադիր հետևում է ՀԱՊԿ-ի գործունեությանը և կազմակերպությունում քննարկվող հարցերին»:
Հիշեցնենք, որ ավելի վաղ Ռուսաստանի փոխվարչապետ Յուրի Բորիսովը Երևանում լրագրողների հետ հարցուպատասխանի ժամանակ հայտարարել էր, որ Մոսկվան դեմ չէ, եթե Ադրբեջանը ՀԱՊԿ-ում դիտորդ դառնա: ՀԱՊԿ գլխավոր քարտուղարի ժամանակավոր պաշտոնակատար Վալերի Սեմերիկովն էլ իր հերթին նշել էր, որ ՀԱՊԿ-ի դռները ոչ մեկի համար փակ չեն, բայց որոշումները կայացվում են կոնսենսուսով:
Կարդացեք նաև
Պատրաստեց՝ Հասմիկ ՄԱՐՏԻՐՈՍՅԱՆԸ
