Աղվերանում սեպտեմբերի 13-15-ը կայացավ «Արեւելյան գործընկերության 10 տարին. ձեռքբերումներ եւ մարտահրավերներ» խորագրով եռօրյա սեմինարը, որ նախաձեռնել էր Երեւանի Մամուլի ակումբը` «Ֆրիդրիխ Էբերտ» հիմնադրամի աջակցությամբ:
Միջազգայնագետ Անահիտ Շիրինյանը խոսեց Արեւելյան գործընկերության եւ ԵՄ նոր ձեւավորված ինստիտուտներից ու վերջին միտումներից, իսկ ԱլԳ ՔՀՖ Հայաստանի ազգային համակարգող Լուսինե Հակոբյանը` Համապարփակ եւ ընդլայնված գործընկերության համաձայնագրի շրջանակներում CEPA քաղաքացիական հասարակության ձեւավորման ընթացքից:
Հետաքրքիր էր նաեւ ԱլԳ ՔՀՖ ղեկավար կոմիտեի անդամ Միքայել Հովհաննիսյանի զեկուցումը` 2019-24 թթ նոր ռազմավարության օրակարգի եւ Եվրոպական հարեւանության վերանայված քաղաքականության մասին::
ԵՄԱ նախագահ Բորիս Նավասարդյանի զեկուցման թեման էր «2009-ի խանդավառություն եւ 2019-ի իրականություն»: Պարոն Նավասարդյանը փաստեց, որ նոր իրողություններով պայմանավորված` Արեւելյան գործընկերությունը եւ Եվրամիությունը առաջվանը չեն լինելու, հետեւաբար պետք է պատրաստ լինենք արդյունավետ աշխատելու:
Կարդացեք նաև
Նրա խոսքերով, թեեւ ժամանակին կային կարծիքներ, որ Արեւելյան գործընկերությունը նախաձեռնություն է, որ փոխարինում է ընդլայնմանը, իրականում այդպես չէ, որովհետեւ Արեւելյան գործընկերությունն ընդլայնման մասին չէր, այլ հարեւանների հետ հարաբերությունների:
«Դա նշանակում էր, որ եթե դու զարգանում ես ու ջնջում ես այն տարբերությունները, որ քեզ մոտ կան ԵՄ անդամ երկրների հետ, մի օր դուռը բացվելու է նաեւ քո առջեւ, ինչպես դա ժամանակին եղավ Մերձբալթյան երկրների համար…Ի՞նչ ունենք այսօր, եւ ինչով է տարբերվում այսօրը 2009-ից… Նախ իր ազդեցությունը թողեց գլոբալ տնտեսական ճգնաժամը, որը թուլացրեց հզոր պետություններին եւ իրենց ֆինանսական ռեսուրսները մոբիլիզացնելը արտաքին նպատակներ լուծելու համար: Ակնհայտ դարձան հակասությունները Ռուսաստանի հետ…»,- նշեց Նավասարդյանը:
Անդրադարձ եղավ ԱՄՆ-ին, Չինաստանի գործոնին: Նրա ձեւակերպմամբ, վերջինս կարող է գրավիչ դառնալ մի շարք երկրների համար: «Բացի ԵՄ երկրներից, որոնք շահագրգիռ են Չինաստանի հետ հարաբերություններով եւ չինական ներդրումները օգտագործելով, նույն գործընթացները տեսնում ենք նաեւ Արեւելյան գործընկերության երկրներում», -նշեց ԵՄԱ նախագահը
ՀՀ ԱԳ նախարարի տեղակալ Ավետ Ադոնցը, որ Եվրոպական միությունում ՀՀ ներկայացուցչության ղեկավարն է եղել եւ ում աշխատանքը վերջին 10 տարում կապված է եղել եվրոպական օրակարգի հետ, նա նաեւ ասոցացման համաձայնագրի բանակցությունների ակունքներում է, խոսեց ԵՄ-Հայաստան համագործակցության ներկա փուլից, իսկ ՀՀ ԱԺ եվրոպական ինտեգրման հարցերի մշտական հանձնաժողովի անդամ Վիկտոր Ենգիբարյանը` ՀՀ քաղաքականության եվրոպական վեկտորում խորհրդարանական դիվանագիտության դերից:
Գոհար ՀԱԿՈԲՅԱՆ
