Հայաստանի պաշտպանության ոլորտին ուղղված ծախսերը 2019թ.-ին ավելացել են շուրջ 26%-ով՝ կազմելով ավելի քան 313 միլիարդ դրամ: Նախորդ տարվա ցուցանիշը եղել է մոտ 247 միլիարդ դրամ: Այս մասին այսօր Վանաձորի տեխնոլոգիական կենտրոնում լրագրողների հետ հանդիպմանը հայտարարեց վարչապետ Նիկոլ Փաշինյանը: Նրա փոխանցմամբ՝ կառավարությունը հավելյալ 2,1 միլիարդ դրամ է տրամադրել՝ զինվորների մարտական հերթապահության պայմանները բարելավելու, այդ թվում՝ մարտական դիրքերը խմելու հոսող ջրով ապահովելու համար:
«Այս տարվա հունիս-օգոստոսին հինգ տոկոսով ավելացել է արեւային էներգիայով սնուցվող դիրքերի քանակը: 5-10%-ով ավելացել է սպառազինության եւ ռազմական տեխնիկայի, այդ թվում՝ խոցման միջոցների քանակը: Առաջնագծում մոտ 10%-ով ավելացել է ժամանակակից տեսադիտարկման սարքերի քանակը: Մինչեւ տարեվերջ մարտական դիրքերի 30-35%-ը կապահովվի խմելու ջրով»,-նշեց Նիկոլ Փաշինյանը: Նա նաեւ ասաց, որ 2020թ.-ի պետբյուջեով ռազմարդյունաբերության ֆինանսավորումը կավելանա 114%-ով:
Հիշեցնենք՝ վարչապետն այսօր ներկայացնում է 100 նոր փաստ՝ նոր Հայաստանի մասին:
Լուիզա ՍՈՒՔԻԱՍՅԱՆ
Կարդացեք նաև
