Այսօր ԱԺ նիստում քննարկվեց «Քրեական օրենսգրքում» փոփոխությունների նախագիծը: Էկոնոմիկայի փոխնախարար Նաիրա Մարգարյանը նախագիծը ներկայացնելիս ասաց, որ ակցիզային դրոշմանիշներով ու դրոշմապիտակներով դրոշմավորման ենթակա ապրանքների՝ առանց այդ պիտակների իրացման դեպքում մարդիկ ոչ թե պիտի քրեական պատասխանատվության ենթարկվեն, այլ վարչական: Այսինքն, ապաքրեականացնում են օրենքը: Նրա բացատրելով՝ քանի որ գործարար միջավայրը քրեական պատասխանատվությունը քիչ է հանդուրժում, ավելի մոտիվացված կլինի տուգանք վճարել խախտումների համար ու չկրկնել դրանք հետագայում, քան քրեական պատասխանատվության ենթարկվել: Բացի այդ` տուգանքների համար հստակ սանդղակ է նշվում, կանոնների խախտման դեպքում 50 հազար դրամից ավելի ապրանքների իրացման դեպքում 1 մլն դրամից տուգանքը բարձրացվում է 1.5 մլն-ի:
«Իմ քայլը» խմբակցության պատգամավոր Արտակ Մանուկյանն ասաց, որ նախագծով բիզնեսի կյանքը թեթեւանում է, բայց մյուս կողմից էլ, երբ տուգանքը 1 մլն-ից դառնում է 1.5 մլն, ավելի կոշտացնում են:
Փոխնախարարն ասաց, որ գործող օրենքով քրեական պատասխանատվության ենթարկելու դեպքում գործարարները դիսկոմֆորտ են ունենում, իրենց հեղինակության հարցն է, ուստի առաջարկում են տուգանել միայն, բայց տուգանքների առումով էլ խստացնել:
«Իմ քայլի» պատգամավոր Արման Եղոյանը հարցրեց. «Նշեցիք՝ գործարարները չեն հանդուրժում քրեական պատասխանատվություն, մի դեպքում ասում եք՝ դիսկոմֆորտ են զգում, բայց իրականում պատիժը հենց դիսկոմֆորտ ստեղծելու համար է, որ չանեն դա: Հիմա կարո՞ղ է այնպես ստացվի, որ վարչական պատասխանատվության ենթարկվելու դեպքում ավելի կոմֆորտ լինի, ձեռնտու լինի ենթարկվել վարչական, ֆինանսական տույժի, բայց շրջանցելով օրենքը՝ ստանան ավելի շատ եկամուտ: Հնարավո՞ր է ավելի ձեռնտու լինի խախտել օրենքը»:
Կարդացեք նաև
Փոխնախարարը պատասխանեց. «Չէ, խախտել օրենքը ֆինանսապես ձեռնտու չի, վարկանշային առումով էլ չէի ասի, որ խիստ ձեռնտու է: Եթե մենք փորձենք բոլոր գործարար խախտումները տեղափոխել քրեական դաշտ, դրանից խստությունը չի ավելանալու: Հակառակը: Տեսեք, խանութի աշխատողը պատահական պոկեց դրոշմապիտակը, ո՞վ է պատասխանատվություն կրում՝ կազմակերպությունը»:
Հռիփսիմե ՋԵԲԵՋՅԱՆ
