Քուվեյթի շեյխուհի, Քուվեյթի Իսլամական հնությունների թանգարանի (DAI) գլխավոր տնօրեն, Ալ-Սաբահ հավաքածուի համասեփականատեր Հուսա Սաբահ Ալ-Սալեմ Ալ-Սաբահը, որը Հայաստան է ժամանել ՀՀ նախագահի տիկին Նունե Սարգսյանի հրավերով, ի թիվս այլ վայրերի, այցելեց Մատենադարան, Գաֆեսճյան թանգարան եւ Հայաստանի ազգային պատկերասրահ:
Նունե Սարգսյանն ասաց, որ ինչպես մյուս երկրների, այնպես էլ Քուվեյթի հետ Հայաստանը շահագրգիռ է ունենալ մշակութային կապեր: «Քանի որ շեյխուհի Հուսան խորապես ծանոթ է արաբական մշակույթին, որոշեցինք իրեն հրավիրել եւ ներկայացնել մեր մշակույթը, այն հույսով, որ կարողանանք մշակութային փոխանակումներ անել: Իրեն առաջարկում ենք իսլամական գրքերի եւ ձեռագրերի Ալ-Սաբահ հավաքածուի բացառիկ նմուշները ցուցադրել Երեւանում, դրա փոխարեն Մատենադարանից ժամանակավորապես Քուվեյթ կտեղափոխենք արաբական ձեռագրերի հավաքածուն: Ահա այս ձեւով մենք կփոխանակենք մեր մշակույթները, որով կկապենք մեր ժողովուրդներին եւ երկրները, քանի որ մշակույթը, երաժշտությունը, գրքերն են առաջին հերթին կապում ժողովուրդներին»,-ասաց տիկին Սարգսյանը:
Կարդացեք նաև
Aravot.am-ը Հուսա Սաբահ Ալ-Սալեմ Ալ-Սաբահից հետաքրքրվեց, թե ինչ տպավորություններ ունի իր հայաստանյան մշակութային շրջագայությունից:
«Հայաստան եմ ժամանել Նունե Սարգսյանի հրավերով, շատ տպավորված եմ այն ամենով ինչ տեսել եմ, հատկապես Մատենադարանով: Հիացած եմ նաեւ ժամանակակից արվեստի թանգարանով»,-ասաց շեյխուհին: Հավելեց, որ պատրաստվում են Քուվեյթում անցկացնել հայկական մշակութային շաբաթ, որը չի սահմանափակվի միայն արվեստի գործերի եւ կամ բացառիկ ձեռագրերի ցուցադրությամբ:
Նունե Սարգսյանն էլ հավելեց, որ Երեւանում էլ Քուվեյթի մշակույթի փառատոն կլինի, որը կընդգրկի ոչ միայն արվեստն ու երաժշտությունը, այլեւ ազգային խոհանոցը, արհեստները; «Նախնական պայմանավորվածություն արդեն կա, հուսով ենք, որ դա կկայանա մյուս տարի»,-նշեց Նախագահի տիկինը:
Հուսա Սաբահ Ալ-Սալեմ Ալ-Սաբահը մեր երկրի մասին ասաց, որ Հայաստանն իրենց սրտում է, քանի որ բազմաթիվ հայ բարեկամներ ունեն, որոնք ապրում են Քուվեյթում եւ այնտեղ են հաստատվել Սիրիայից, Լիբանանից ու աշխարհի այլ անկյուններից: Ասաց նաեւ, որ շատ սիրում է հայկական խոհանոցը, քաղցրավենիքը;
Շեյխուհին Հայաստանը բնորոշեց որպես փոքրիկ, բայց ինքնատիպ գեղեցիկ երկիր, որը հարուստ մշակութային ժառանգություն ունի, եւ Հայաստանի դիմագիծը հենց մշակույթն է:
Գոհար ՀԱԿՈԲՅԱՆ
