Ամուլսարի քայլերթի մասնակիցները Ազատության հրապարակում հնչեցրին իրենց պահանջները:
Երթի մասնակցում էին նաև ՀՀ ԱԺ անկախ պատգամավոր Արման Բաբաջանյանը, «Քաղաքացու որոշում» սոցիալ-դեմոկրատական կուսակցության գերագույն մարմնի անդամ, կուսակցության քարտուղար Սուրեն Սահակյանը, քաղաքագետ Հայկ Մարտիրոսյանը:
Ամուլսարի պահապանները հայտարարեցին. «Անմիջապես փոխել Ամուլսարի խնդրի շուրջ ստեղծված իրավիճակի ողջ տրամաբանությունը, որը կեղծ ու ոչ ամբողջական է: Դադարեցնել ժողովրդական պահանջի անտեսումը ու համեմատումը այն անհատների խմբի պահանջի հետ, որոնք անմիջական շահառուներն են, և հանքի բացումը ուղիղ բխում է իրենց ֆինանսական շահերից: Ուժը կորցրած ճանաչել Լիդիանի փորձաքննական պետական փորձաքննությունը՝ հենվելով բացահայտ թերությունների վրա՝ հաշվի առնելով, որ իրենց փաստարկներում անտեսված են եղել բնապահպանական բազմաթիվ գործոններ:
Ուսումնասիրել նախորդ իշխանությունների օրոք տրված կասկածելի թույլտվությունը, բացահայտել այս գործով բոլոր հանցանքներն ու կոռուպցիոն դեպքերը: Պահանջել Լիդիանից դուրս բերել շինտեխնիկան և վերականգնել լեռան՝ արդեն հասցված վնասները: Խախտված է շրջակա միջավայրի վրա ազդեցությունը, գնահատման և փորձաքննության մասին ՀՀ օրենքի սկզբունքները, խախտվել է ընդերքի մասին ՀՀ օրենսգրքի, Սևանա լճի մասին գիտական և գիտատեխնիկական փորձաքննության տեխնիկական անվտանգության ապահովման պետական կարգավորումների մասին ՀՀ օրենքների դրույթները:
Կարդացեք նաև
Հաշվի առնելով վերոնշվածը՝ հայտարարում ենք, որ թվարկված պահանջների իրականացման համար մենք ակնկալում ենք կառավարության արձագանքը խելամիտ ժամկետում: Ջերմուկի՝ մեր հայրենակիցները հայտարարում են, որ սեպտեմբերի 20-ից հետո գործադուլներ ու դասադուլներ են լինելու, եթե հաշվի չառնեն մեր պահանջները: Հորդորում ենք օր առաջ լուծել Ամուլսարի խնդիրը»:
Երթի մասնակիցները հայտարարեցին՝ մենք ամեն վայրկյան պատրաստ ենք ցույց տալ մեր ուժն ու հզորությունը հանուն Հայաստանի, եկեք երկիրը չտանենք ցնցումների:
Քաղաքագետ Հայկ Մարտիրոսյանը քննադատեց «Իմ քայլը» խմբակցության պատգամավորներին, որ ձայն չեն անում և ասաց, որ դրա պատճառը կռապաշտությունն է իրենց առաջնորդի նկատմամբ և աթոռը կորցնելու վախը:
Տաթև ՀԱՐՈՒԹՅՈՒՆՅԱՆ
