Սեպտեմբերի 14-ին «Պոստ Սկրիպտում» մամուլի ակումբում «Վարորդի ընկեր» հասարակական կազմակերպության հրավիրած ասուլիսին հ/կ-ի նախագահ Տիգրան Քեյանը խոսեց ճանապարհային երթևեկության կանոնակարգման բալային համակարգի ներդրման մասին։
Ազգային ժողովում առաջին ընթերցմամբ ընդունված օրինագծով նախատեսվում է վարորդական վկայական ստանալու օրվանից մեկ տարի ժամկետով անձին տրամադրել 9 միավոր, որը նախատեսված է 100 վարչական խախտումից քսանի համար, ինչն էլ կնվազեցնի գումարային արժողությունը, փոխարենը՝ վարորդը կզրկվի բալային համակարգի միավորներից․ «Եթե տարվա ընթացքում վարորդը սպառի բոլոր միավորները, ապա նրա վարորդական իրավունքը կարող է կասեցվել մեկից մինչև վեց տարի ժամկետով, երկրորդ անգամ նույն քանակի միավորները սպառելուց հետո անձը կզրկվի երթևեկելու իրավունքից» -հավելեց հ/կ-ի նախագահ Տիգրան Քեյանը։
Կազմակերպության ղեկավարը նշեց, որ իրենց կայքում անցկացված քվեարկությանը մասնակցած 3000 վարորդից միայն 23 տոկոսն է դեմ օրինագծին․ հիմնական դժգոհություններն էլ պայմանավորված են ճանապարհային վատ վիճակով։ Տիգրան Քեյանի խոսքով 2017 թվականի վիճակագրական տվյալներով վարորդների միայն 6 տոկոսը կբախվեր վարորդական իրավունքի կասեցման խնդրին․ «Մենք առաջարկել ենք ընդառաջել գրագետ վարորդներին, որոնք կցանկանա քննություն հանձնել ու վերականգնել իրենց կորցրած միավորները՝ խուսափելով երթևեկության իրավունքի կասեցման վտանգից»։
Կարդացեք նաև
Մարիամ ԱՎԱՆԵՍՅԱՆ
