ՀՀ ԱԺ նախագահ Արարատ Միրզոյանը արտահերթ ելույթ խնդրեց, երբ քննարկվում էր ՀՀ ԱԺ «Լուսավոր Հայաստան» խմբակցության ներկայացրած նախագիծը, որով առաջարկվում է փոփոխություն կատարել «Ազգային անվտանգության մարմիններում ծառայության մասին ՀՀ օրենքում և վերաբերում է ազգային անվտանգության ծառայության տնօրենի եւ ոստիկանության պետի պաշտոնները քաղաքական պաշտոն համարելուն՝ այդ պաշտոններում նշանակվող անձանց համար սահմանելով պատգամավորի թեկնածուին ներկայացվող պահանջները:
Արարատ Միրզոյանը փոփոխությունը համարեց չափազանց կարևոր քաղաքական իշխանության պատասխանատվության և բարեփոխումների առումով ու հայտարարեց. «Անկեղծ լինենք ու ճիշտ հասկանանք իրար: Առաջարկը, որը «Լուսավոր Հայաստանն» անում էր ժամանակին, մենք դեմ ենք եղել: Այն ժամանակ առաջարկվում էր, որ նախարարներ լինեն ԱԱԾ պետն ու ոստիկանապետը, լինեն կառավարության անդամ, որ նաև հարցուպատասխանի ժամանակ գան, նստեն, ու հարցեր ուղղենք նրանց: Մենք դեմ էինք այն պատճառով, որ եթե վերահսկողությունն ու հաշվետվողականությունն է հարցը, հազար այլ գործիք կա: Եթե այստեղ չորեքշաբթի դահլիճ գալն է, եկեք օրենքը համապատասխան ձևով փոխենք, այդ օրը գան: Դեմ էինք, որ չլինեն այդ մարմինների ղեկավարները քաղաքական, քանի որ մեր պետությունն ունի վատ փորձ: Մենք ունենք մի քանի չստացված փորձ, երբ քաղաքական գործիչները ղեկավարել են ԱԱԾ-ն և ոստիկանությունը և արդյունքում այնքան էլ լավ չի ստացվել: Իրենք այնքան մեծ կշիռ են ձեռք բերել, որ ոչ բնական ձևով ազդել են քաղաքական գործընթացների վրա, հետագայում մեկը նույնիսկ դարձել է նախագահ, վարչապետ, հետո նորից ուզում էր վարչապետ դառնալ, մի քանի օրով ստացվեց: Արդյոք այս վատը միշտ պե՞տք է լինի ուղենիշ: Հիմա չէ, մենք բաց ենք քննարկման համար: Դրա համար այս տարբերակը, որ բերել ենք և փաստարկները, ընդունելի են: Չափազանցություն չեմ անի. Տարոն Սիմոնյանի փաստարկներն անխոցելի են»:
Արարատ Միրզոյանը անդրադարձավ այն քննարկումներին, թե ԱԱԾ պետը ո՞նց կլինի լինի քաղաքական, իսկ ո՞վ է ասել, որ դա կրթության նախարարից կարևոր է: Ու մանրամասնեց. «Ինչո՞ւ յուրաքանչյուր ընտրությունից հետո կրթության և առողջապահության նախարարները կարող են փոխվել, իսկ ԱԱԾ ղեկավարը՝ ոչ: Ո՞վ է ասում, որ պաշտպանության նախարարից ավելի կարևոր է, և այն մոդելը, որ այդ նախարարության դեպքում աշխատում է, չի աշխատի ԱԱԾ դեպքում: Մենք ուրիշ բանի համար էինք դեմ: Եթե հիշողությունս չի դավաճանում, վարչապետն այս ամբիոնից ասաց, որ ԱԺ նախագահն է եղել դեմ: Այո, ես եմ եղել մեկը նրանցից, որ ասել եմ՝ անընդունելի է: Այս տարբերակը միանգամայն ընդունելի է: Քաղաքական պատասխանատվություն դնելու հարց է, եթե մենք պատասխանատու ենք առողջապահության համար, ինչո՞ւ չպետք է ընդունենք ոստիկանության համար, ինչքա՞ն կարող ենք ասել ոստիկանությո՞ւնը, չէ….մեզնից մեկը պիտի դառնա ոստիկանապետ»:
Այնուհետև հավելեց՝ գործող ոստիկանապետին նսեմացնելու մասին չի խոսում, այլ մոդելի, որ ոստիկանապետը պետք է քաղաքական պատասխանատվություն ստանձնի:
Կարդացեք նաև
Տաթև ՀԱՐՈՒԹՅՈՒՆՅԱՆ
