ՀՀ ԱԺ-ում քրեական օրենսգրքում լրացում կատարելու և ՀՀ վարչական իրավախախտումների վերաբերյալ ՀՀ օրենսգրքում փոփոխություններ կատարելու մասին հարցի քննարկման ժամանակ «Իմ քայլը» խմբակցության պատգամավոր Սասուն Միքայելյանը, դիմելով օրինագիծը ներկայացնող, ՀՀ ԱԺ ԲՀԿ խմբակցության պատգամավոր Նաիրա Զոհրաբյանին, ասաց. «Տիկին Զոհրաբյան, նախ ողջունում եմ Ձեր կենդանասիրությունը, բայց նախագիծը ժամանակավրեպ է: Ավելի ճիշտ չէ՞ր լինի այլ օրենքի նախագծով հանդես գայիք. կենդանիների պահման տարածքների ստեղծում կամ հատուկ ծառայության ստորաբաժանումներ…լավ գիտեք՝ գյուղերում ինչ է կատարվում, մարդիկ շատ դեպքերում գյուղերում ոտքով են գնում գյուղից գյուղ, ու շները հարձակվում են նրանց վրա: Իմ հարգարժան Անդրանիկ Քոչարյանը հարցնում է, եթե շունը գիշերը հարձակվի վրաս, ի՞նչ անեմ: Ասում եմ՝ պիտի կանգնես, կծի էթաս, կամ էլ բանակցես: Ուստի ավելի ճիշտ չէ՞ հատուկ ծառայություն ստեղծել, հետո նման օրենքի նախագիծ բերել»:
Նաիրա Զոհրաբյանն ասաց, որ տարբեր բաների մասին են խոսում. «Մենք խոսում ենք կենդանիների հանդեպ դաժան վերաբերմունքի համարժեք իրավական, քրեական գնահատական տալու հարցի մասին: Ես չեմ մտածում, եթե ինչ-որ մեկը խեղում է կենդանուն և իր ֆեյսբուքյան էջում դնում դա, դա այն պատճառով է, որ այդ կենդանին չի պահվում հատուկ պայմաններում…»:
Տաթև ՀԱՐՈՒԹՅՈՒՆՅԱՆ
