ՀՀ ԱԳՆ մամուլի խոսնակ Աննա Նաղդալյանը ճեպազրույցում հայտնեց, որ սեպտեմբերի 9-ին ՀՀ եւ ԳԴՀ կառավարությունների միջեւ ստորագրվել է Հայաստան-ԵՄ ռեադմիսիայի մասին համաձայնագիրը կիրարկող արձանագրություն, ինչից հետո եղել են բազմաթիվ մեկնաբանություններ, թե ինչ է իրենից ներկայացնում այդ արձանագրությունը:
«Այս արձանագրության ստորագրումը նախատեսված է Հայաստան-ԵՄ ռեադմիսիայի մասին համաձայնագրով, որի 20-րդ հոդվածով նշված է, որ Հայաստանը եւ ԵՄ անդամ պետությունները պետք է համաձայնագրի կիրարկման վերաբերյալ համապատասխան արձանագրություններ ստորագրեն: Արձանագրությունը տեխնիկական փաստաթուղթ է, որով կողմերը փոխադարձության սկզբունքով համաձայնում են ստեղծել արդյունավետ իրավական ընթացակարգեր այն մարդկանց հայտնաբերման, անվտանգ ու կանոնակարգված կերպով փոխանցման առնչությամբ, որոնք չեն համապատասխանում ՀՀ եւ ԵՄ անդամ պետությունների սահմանը հատելու, այլ տեղ գտնվելու եւ բնակվելու չափանիշներին, ինչպես նաեւ դյուրացված կերպով կազմակերպել նրանց տարանցումը»,-պարզաբանեց մամուլի խոսնակը` ներկայացնելով առանց թույլտվության բնակվող անձանց հետընդունման մասին արձանագրությունը:
Հավելեց, որ ՀՀ-ն նման արձանագրություններ ստորագրել է նաեւ Բենիլյուքսի պետությունների (Նիդերլանդներ, Բելգիա, Լյուքսեմբուրգ), ԳԴՀ-ի, Էստոնիայի եւ Ֆրանսիայի հետ: Ներկայումս նախագծման փուլում են գտնվում կիրարկվող արձանագրություններ` Բուլղարիայի, Չեխիայի, Լատվիայի, Լիտվայի, Լեհաստանի եւ Շվեդիայի հետ:
ԱԳՆ մամուլի խոսնակը տեղեկացրեց, որ սեպտեմբերի 13-ին ԱԳՆ-ում կայանալու է «Հայաստան-ԵՄ մուտքի արտոնագրի դյուրացման հարցերով համատեղ կոմիտեի 5-րդ նիստը, որի ժամանակ անդրադարձ կարվի նաեւ խնդիրներին:
Կարդացեք նաև
«Հայկական կողմը ԵՄ գործընկերների ուշադրությունն է հրավիրելու այն հանգամանքի վրա, որ ՀՀ քաղաքացիներից ստացվում են բազմաթիվ բողոքներ, որոնք կապված են ԵՄ անդամ պետությունների հյուպատոսություններում մուտքի արտոնագրի ստացման համար գրանցման խելամիտ ժամկետների ամրագրման համար առաջացող բարդությունների եւ այն անհիմն մերժումների քանակի հետ, որոնք կապված են հատկապես այն անձանց հետ, որոնք բավական հաճախ են շրջագայում ԵՄ անդամ պետությունների տարածքներում: Դրանց թվում են` գիտնականները, ուսանողները, արվեստագետները, լրագրողները եւ այլք: Հայաստանը մշտապես նշել է, որ ԵՄ համագործակցությունը կարեւորում է մարդկանց միջեւ շփումների խրախուսումը եւ մենք մշտապես հանձնառու ենք լինելու այս հարցին», -ընդգծեց Նաղդալյանը:
Գոհար ՀԱԿՈԲՅԱՆ
