Պետական համակարգի աշխատանքի արդյունավետության վերաբերյալ հանրության ընկալումներն ու գնահատկանը ձևավորող գործոններից են հանրային ծառայությունների որակից բավարարվածությունը:
Այս առումով կառավարության ծրագրով որպես հիմնական խնդիր ամրագրել ենք պետության կողմից մատուցվող ծառայությունների որակի արդիականացումը, ավտոմատացումը և թվայնացումը, ծառայությունների մատուցումը «մեկ կանգառ, մեկ պատուհան» և «միայն մեկ անգամ» սկզբունքի կիրառմամբ, ինչը հնարավորություն կտա պետական մարմինների միջև տվյալների փոխանակման շնորհիվ քաղաքացուց ցանկացած տվյալ ստանալ միայն մեկ անգամ։
Բարեփոխումների արդյունքում ակնկալում ենք, որ քաղաքացին չպետք է ծառայություն ստանալու համար այցելի բազմաթիվ պետական մարմիններ, հավաքագրի տարբեր տեղեկանքներ և տեղեկություններ, որոնք արդեն առկա են մեկ այլ պետական մարմնում։ Քաղաքացին պետք է ծառայությունները ստանա իր բնակության վայրին հնարավորինս մոտ սպասարկման գրասենյակից։ Այս առումով արդեն ունենք նշանակալի ձեռքբերումներ։ Շատ ծառայություններ արդեն մատուցում ենք առցանց։ Քաղաքացիական կացության ակտերի գրանցման ոլորտում սեպտեմբերի 1-ից քաղաքացիները ծառայությունների ստացման կարող են դիմել ցանկացած ՔԿԱԳ բաժին։ Մի շարք ծառայությունների համար քաղաքացիները կարող են դիմել պետական իշխանության մարմինների սպասարկման գրասենյակների գործառույթներ իրականացնող օպերատորներին։
Միևնույն ժամանակ ոլորտում առկա մյուս խնդիրները լուծելու համար Հանրային կառավարման բարեփոխումների շրջանակներում այս տարի տալիս ենք պետական ծառայությունների ոլորտի բարեփոխումների լայնածավալ ծրագրի մեկնարկը։
Կարդացեք նաև
Այսպես, հանձնարարել եմ իրավասու մարմիններին պատշաճ կանոնակարգելու երեխաների ծննդյան, ինչպես նաև քաղաքացիների մահվան գրանցման գործընթացը, այս գործընթացներում պարզեցնել վարչարարությունը և բարելավել մատուցվող ծառայությունների որակը։ Մասնավորապես, նախատեսվում է կրճատել ծառայություն մատուցող մարմինների ցանկը, քաղաքացու դիմումի հիման վրա երեխաներին Հանրային ծառայությունների համարանիշ տրամադրել ծնունդը գրանցելիս և ամրագրել ծննդյան վկայականում։ Բացի դրանից՝ նախատեսում ենք, որ երեխայի ծննդյան միանվագ նպաստի և մահվան դեպքում թաղման նպաստի ստացման համար քաղաքացին պետք է դիմում ներկայացնի՝ առանց սոցիալական մարմիններ այցելելու։
Հանձնարարել եմ նաև քննարկել փորձարարական կարգով երեխաների ծննդյան վկայականները անմիջապես բժշկական հաստատությունում տրամադրելու հարցը՝ առանց քաղաքացիական կացության ակտերի գրանցման մարմիններ այցելելու։
‼️Շարունակաբար բարելավելու ենք մեր քաղաքացիներին մատուցվող պետական ծառայությունների որակը։
Տիգրան ԱՎԻՆՅԱՆ
ՀՀ փոխվարչապետ
