«Առավոտի» հարցերին է պատասխանում «Իմ քայլը» խմբակցության պատգամավոր Թագուհի Ղազարյանը:
– Տիկին Ղազարյան, այս օրերին շատ է քննարկվում վարչապետ Նիկոլ Փաշինյանի եւ «Սասնա ծռեր» կուսակցության անդամների հանդիպումը: Ինչպե՞ս եք վերաբերվում այդ հանդիպմանը:
– Ինձ չի թվում, թե շատ է քննարկվում, սկսենք այդտեղից: Ավելի շատ հարցադրումներ են հնչում հենց էս տեսակ լրատվամիջոցների կողմից: Որեւէ կոնկրետ վերաբերմունք վարչապետի հանդիպումների հետ կապված չունեմ:
– Հատկապես «Սասնա ծռերի» անդամների հետ հանդիպման նկատմամբ վերաբերմունքն է հետաքրքիր` նկատի ունենալով, որ այդ այժմ արդեն այդ կուսակցության անդամներից մի քանիսը, զինված հարձակում էին գործել ՊՊԾ գնդի վրա:
Կարդացեք նաև
– Ճիշտ եք ասում: Այսինքն, այդ փաստերն անհերքելի են, բայց, այնուամենայնիվ, կարծեմ որպես կուսակցական գործիչներ ցանկություն են ունեցել վարչապետի հետ հանդիպելու, վարչապետն էլ չի մերժել: Իմ ունեցած տեղեկություններն այդքան են: Ոչ մի առանձնահատուկ բան տեղի չի ունեցել էլի, որպեսզի շատ մեծ մեկնաբանությունների տեղիք տա: Իհարկե, իրենց հայտարարությունները հետո տեղի ունեցած մի քիչ խնդրահարույց էին: Բայց կարծեմ, դա հանդիպման բովանդակության եւ նպատակի հետ որեւէ կապ չունի: Ավելի շատ այդ հանդիպումը թույլ տվեց իրենց տեսանելիությունը մեծացնել եւ հետո, իրենց նպատակահարմար հայտարարությունները տարածել:
– Հենց դա, ինքնին արդեն խնդրահարո՞ւյց չէ, որ վարչապետը հանդիպում է ունենում մի կուսակցության անդամների հետ, որոնք ընդամենը մի քանի տարի առաջ զինված հարձակում էին գործել պետական ծառայության վրա: Նաեւ, այդ օրերին, ընդդիմադիր Նիկոլ Փաշինյանը երբ փորձեց հանրահավաք անել, բավական վիրավորական արտահայտություններ հնչեցին այդ մարդկանց կողմից`իր հասցեին, պարզապես թույլ չտվեցին, որպեսզի այդտեղ հավաքված հանրությանն առաջնորդի: Հիմա այս հանդիպումով արդյոք վարչապետը չի լեգիտիմացնում իրենց գոյությունն ու գործունեությունը, մանավանդ, Դուք էլ ասացիք, որ «Սասնա ծռերն» այդ հանդիպումով իրենց տեսանելիություն ապահովեցին:
– Չեմ ցանկանում մեկնաբանել վարչապետի հանդիպելու հնարավորությունների շրջանակը: Ինքը կարող է հանդիպել բոլոր գործիչների եւ քաղաքացիների հետ: Եվ դա նորմալ է: Դա շատ ավելի նորմալ է, քան նախկինում ընդունված պրակտիկան, երբ վարչապետները կամ երկրի ղեկավարները չէին հանդիպում մարդկանց հետ: Ինչ վերաբերվում է այդ իրադարձություններին, կարծեմ այն ժամանակ հստակ գնահատականը կամ վերաբերմունքը ցույց է տրվել, ինչպես Դուք նշեցիք ընդդիմադիր Նիկոլ Փաշինյանի, թե «Քաղաքացիական պայմանագիր» թիմի կողմից: Այդ ժամանակվա ներկայությունն այնտեղ, ավելի շատ իրավիճակը չէսկալացնելու դեր է ունեցել, քան որեւէ այլ գործոն: Ես հիշում եմ այդ իրադարձությունները, չեմ կարծում, որ դրանք վերաշարադրելու կարիք կա. այն ժամանակ ես դեռ կուսակցական չէի, զուտ որպես քաղաքացի էի, ինքս էլ գտնվում էի Խորենացի փողոցում եւ ինքս էլ իմ եւ մյուս քաղաքացիների ներկայությունը դիտարկում էի, որպես իրավիճակի էսկալացիայից խուսափելու միջոց:
– Այսինքն, Դուք նորմա՞լ եք համարում, երբ վարչապետը հանդիպումներ է ունենում կառավարության շենքում, այդ թվում նաեւ զենքի ուժով գործողությունների կողմնակից գործիչների հետ:
– Ես նորմալ եմ համարում, երբ որ վարչապետը հանդիպումներ է ունենում:
– Հստակեցնենք` այդ թվում նաեւ զենքի ուժով գործողությունների կողմնակից գործիչների՞ հետ:
– Ես նորմալ եմ համարում, երբ վարչապետը հանդիպումներ է ունենում բոլոր այն քաղաքացիների եւ գործիչների հետ, ում հետ ինքը, որպես վարչապետ, նպատակահարմար է գտնում: Դրանից ընդամենը մի քանի օր առաջ, մեկ այլ կուսակցության ներկայացուցիչների հետ էր հանդիպել վարչապետը եւ, կարծում եմ, դա շարունակական կլինի`տարբեր արտախորհրդարանական գործիչների հետ հանդիպումները: Ոչ մի սարսափելի ահազանգ այդտեղ չեմ տեսնում: Դրանից առաջ, եթե հիշում եք, արդեն կառավարական առանձնատնից հրապարակված լուսանկարներից հայտնի դարձավ, որ «Քաղաքացու որոշում» կուսակցության ներկայացուցիչների հետ է հանդիպել: Ես կարծում եմ, սրանից հետո, ուրիշ կուսակցության ներկայացուցիչների հետ էլ պետք է հանդիպի. ի վերջո, ինքը վարչապետ է եւ բոլոր տեսակի մտքեր ունեցող, այսպես ասած, քաղաքական օրակարգեր ունեցող գործիչների հետ պետք է շփվի:
– «Սասնա ծռերի» բացառիկությունը հենց այն է, որ իրենք բացահայտ էին հայտարարում`զենքով հարցեր լուծելու կողմնակից լինելու մասին:
– «Սասնա ծռերի» գործը դեռեւս դատավարության փուլում է եւ ես կարծում եմ, որ այստեղ, իրավական կոնտեքստում, դա անքննելի է, որ օրենքի խախտում է տեղի ունեցել: Հույս ունեմ, դատավճիռը հենց այդպիսին էլ… իրավական առումով, այլ մեկնաբանություն լինել չի կարող:
– Վերջերս, երբ ՀԱԿ ակտիվիստ Վարդան Հարությունյանին ծեծի էին ենթարկել եւ ՀՅԴ-ական շատ գործիչներ ֆլեշ-մոբ էին սկսել, Դուք խորհրդարանի ամբիոնից ահազանգում էիք ՄԻՊ-ին եւ դեմ էիք արտահայտվում բռնություններին: Ուզում եմ հասկանալ Ձեր խտրական վերաբերմունքը`բռնությունների կողմնակից անձանց մասով:
– Ես բռնություններին դեմ եմ արտահայտվել 2016-ին, ես հիշում եմ, որ այն ժամանակ վարչապետը ևս այն ժամանակ բռնություններին դեմ է արտահայտվել: Եթե հիշում եք, այդ բաց ձեռքերի սիմվոլը ծնվել է ավելի շուտ 2016-ին, Խորենացի փողոցում: Այն ժամանակ ընդունվել է ոչ միանշանակ, բայց ես այն ժամանակ էլ եմ բռնություններին դեմ արտահայտվել, դրանից հետո էլ`շարունակաբար, հիմա էլ եւ այդ կոնտեքստում պիտի ասեմ, որ ինձ համար նորմալ կլինի նաեւ եթե մյուս`քաղաքական դերակատարում ունենալ հավակնող գործիչների, այդ թվում նաեւ Ձեր նշած կուսակցության անդամների հետ վարչապետը հանդիպում ունենա: Թեեւ հանդիպումը դեռեւս չի նշանակում, որ… այստեղ հարցն այն է ավելի շատ`հանդիպե՞լն է կանխում բռնության գործողությունները, թե՞ չհանդիպելը: Միգուցե չհանդիպելը ավելի էսկալացիոն դեր ունենա:
– Իսկ ինչպե՞ս եք վերաբերվում, արդեն հանդիպումից հետո, «Սասնա ծռերի»`արտահերթ խորհրդարանական ընտրությունների մասին հայտարարություններին:
– Լուրջ չեմ վերաբերվում, եթե շատ կարճ ասեմ:
Զրույցը` Նելլի ԳՐԻԳՈՐՅԱՆԻ
Լուսանկարը՝ Թագուհի Ղազարյանի ֆեյսբուքյան էջից
