Հուլիսի 24-ին Երևանի ընդհանուր իրավասության դատարանում (Արաբկիր, Քանաքեռ-Զեյթուն) դատավոր Զարուհի Նախշքարյանի նախագահությամբ սկսվեցին Կոնստանտին Օրբելյանի քաղաքացիական հայցի լսումները, որով նա պահանջում է իրեն Ալ․ Սպենդիարյանի անվան օպերայի և բալետի ազգային ակադեմիական թատրոնի տնօրենի պաշտոնից ազատելու 2019թ. մարտի 28-ի հրամանը ճանաչել անվավեր, և վերականգնել այդ պաշտոնում, նաեւ վճարել ֆինանսական փոխհատուցում` հարկադիր պարապուրդի համար:
Դատարանը Կոնստանտին Օրբելյանի հայցի պատասխանող կողմին՝ ՀՀ մշակույթի նախարարությանը պարտավորեցրել է ներկայացնել ապացույցներ։
Aravot.am-ը դատարանում Կոնստանտին Օրբելյանի շահերը ներկայացնող փաստաբան Տիգրան Մարտիրոսյանից հետաքրքրվեց, թե ինչ փուլում է գործը:
«Դատաքննությունն ավարտվեց, դատարանը գնաց վճռի կայացման: Վճիռը կհրապարակվի հոկտեմբերի 2-ին, եւ այժմ մենք սպասում ենք արդյունքներին»,-ասաց փաստաբանը:
Կարդացեք նաև
«Մենք ի սկզբանե գտնում ենք, որ մեր հայցը հիմնավոր է, որովհետեւ այն բոլոր փաստարկները, որ մշակույթի նախարարությունը ներկայացրել է՝ ազատելով պարոն Օրբելյանին պաշտոնից, դրանք էին լեզվի վերաբերյալ պահանջը, ենթադրյալ խախտումները, գեղարվեստական ղեկավարի եւ տնօրենի պաշտոնների անհամատեղելիության նորմը, ենթադրյալ խախտումը, իրեն նշանակման հրամանի ոչ իրավաչափությունը, դրանց վերաբերյալ ունենք մեր փաստարկները, ընդ որում յուրաքանչյուր կետի վերաբերյալ մի քանի փաստարկ: Դրանք դատարան ենք ներկայացրել: Ընդ որում, երեկ նիստին ներկա էր նախարարության ներկայացուցիչը, եւ ըստ էության, ես իրենից երեկ չստացա մեր փաստարկների վերաբերյալ իրենց որեւէ հիմնավորված հակափաստարկ: Այդքանը հաշվի առնելով` մենք նորից պնդում ենք, որ մեր հայցը հիմնավոր է եւ հույս ունենք, որ արդարադատություն կիրականացվի»,- հավելեց պարոն Մարտիրոսյանը:
Գոհար ՀԱԿՈԲՅԱՆ
