Քանի որ շոգը նահանջել է, և դրա հետ կապված հրդեհային իրավիճակը անհամեմատ հանգիստ է, ճիշտ ժամանակն է անդրադառնալ անտառածածկ տարածքներում արձանագրվող հրդեհների ռիսկի նվազեցման խնդիրներին:
Գլոբալ տաքացմանը զուգահեռ, ինչպես ամբողջ աշխարհում, այնպես էլ Հայաստանում, ամեն տարի անտառածածկ տարածքներում գրանցված հրդեհների թիվը ենթադրաբար աճելու է, քանի որ տևական շոգ եղանակը տարեցտարի ավելի ու ավելի է չորացնելու և ջրազրկելու կանաչ տարածքները:
Որպես հետևանք, յուրաքանչյուր տարի հսկայական տարածքներ հրդեհից ոչնչացման իրական վտանգի տակ են հայտնվելու:
Միամտություն կլինի ակնկալել, որ հաջորդ տարի անտառային հրդեհներ չեն գրանցվի, ուստի պետք չէ ժամանակ կորցնել:
Հայաստանի Հանրապետությունը պետք է ունենա անտառային հրդեհների դեմ պայքարի ռազմավարություն:
Ռազմավարությունը պետք է ընդգրկի և կանխարգելման, և արձագանքման կարճաժամկետ և երկարաժամկետ միջոցառումներ:
Կանխարգելման ուղղությամբ կարևոր քայլերից է բուսածածկ, անտառածածկ տարածքներում ոռոգման ցանցի աստիճանական ընդլայնումը:
Սա համալիր միջոցառում է, որը պետք է իրականացվի փուլ առ փուլ, ինչպես պետության կողմից ֆինանսավորմամբ, այնպես էլ տեղական ինքնակառավարման մարմինների ուժերով:
Պետք է նաև խիստ հսկողություն սահմանել, որպեսզի այն տարածքներում, որտեղ առկա է ոռոգման ցանց, ոռոգումը իրականացվի պատշաճ ձևով, հատկապես տարվա շոգ ամիսներին:
Ինչպես հայտնի է, անտառածածկ տարածքները շատ հաճախ հեռու են ջրային պաշարներից, գետերից, որն էլ լրացուցիչ դժվարություններ է ստեղծում հրդեհաշիջման աշխատանքների արդյունավետ կազմակերպման համար:
Այս խնդիրը մեղմելու համար, դեպի անտառային տարածքներ տանող հատվածներում, դեպի անտառ մոտեցող ճանապարհների մոտակայքում անհրաժեշտ է փորել խորքային արտեզյան հորեր, որը հնարավորություն կտա հրդեհի դեպքում, առանց ժամանակ կորցնելու և ավելորդ ջանք գործադրելու օգտվել ջրային պաշարներից:
Սա հնարավորություն կտա նաև խողովակների միջոցով անընդհատ ջրի մուտք ապահովել անտառի այն հատվածներ, որտեղ հրդեհաշիջում իրականացնող տեխնիկան չի կարող աշխատել:
Բացի դրանից, պետք է մեծ ջրափոսեր պատրաստել անտառի բացատային հատվածներում, որտեղ կլցվեն նաև գարնանային հալոցքների ջրերը:
Վերոգրյալը մի մասն է միայն այն բոլոր միջոցառումների, որոնք անհրաժեշտ է իրականացնել շրջակա միջավայրին, անտառներին սպառնացող հրդեհի և անապատացման ռիսկերը մեղմելու համար:
Այս և մյուս միջոցառումների մի մասը , ողջամիտ ծավալներով, ցանկալի է, որ իրականացված լինեն մինչև հաջորդ ամառ, քանի որ շոգ եղանակը իր հետ կբերի անտառային հրդեհների նոր ալիք:
Հայկ ԱՐԱՄՅԱՆ
