«Ես կարծում եմ, որ և ՌԴ-ում, եւ ՀՀ-ում պետական իշխանությունները բավական լուրջ են, որպեսզի միջազգային հարաբերությունները պայմանավորեն միջանձնային հարաբերություններով»,- Aravot.am-ի հետ զրույցում ասաց «Իմ քայլը» խմբակցության պատգամավոր, ԱԺ արտաքին հարաբերությունների հանձնաժողովի անդամ Շիրակ Թորոսյանն`անդրադառնալով հայ-ռուսական հարաբերություններում հերթական լարված փուլի մասին խոսակցություններին: Մեր զրուցակիցը հավաստիացնում է նաեւ, որ ՀՀ եւ ՌԴ ղեկավարների միջեւ նաեւ միջանձնային հարաբերություններն են նորմալ եւ դրա մասին հայտարարություններ, երկու երկրների ղեկավարների կողմից, եղել է:
Նա հորդորում է հիմնվել պաշտոնական հարաբերությունների եւ հայտարարությունների վրա`վստահեցնելով, որ հայ-ռուսական հարաբերությունները ոչ վատթարանալու հիմքեր ունեն, ոչ էլ իրավունք, քանի որ դրանք խարսխված են աշխարհաքաղաքական լրջագույն ընդհանրական շահերի վրա, ոչ թե անձնական համակրանքների:
Հարցին`պաշտոնակա՞ն է, կամ ցուցադրակա՞ն է այն, որ Կրեմլի կայքում, տարբեր առիթներով շնորհավորանքներ են տեղադրվում ՀՀ երկրորդ, երրորդ նախագահներին ուղղված, Շիրակ Թորոսյանը պատասխանեց, որ դրանք միջանձնային հարաբերություններ են, որոնք չեն կարող միջպետական հարաբերությունների վատթարացման առիթ կամ պատճառ դառնալ: Իսկ ինչո՞վ է պայմանավորված պաշտոնական Ռուսաստանի դիրքորոշումը`անընդհատ ընդգծել Ռոբերտ Քոչարյանի, երբեմն նաեւ Սերժ Սարգսյանի գործոնը. այս հարցին մեր զրուցակիցը` հղում անելով ՌԴ-ից հնչած կիսապաշտոնական հայտարարությունների վրա, ասաց, որ հարցը միջանձնային տիրույթում է. «Իմ ընկերն է, եւ վերջ»:
ԵԱՏՄ բարձրագույն խորհրդի նիստին ՌԴ նախագահի մասնակցության մասով էլ ասաց, որ պաշտոնապես հայտարարվել է, որ Պուտինը նիստին մասնակցելու է, այլ հայտարարություն դեռ չի հնչել: Շիրակ Թորոսյանը չի էլ կարծում, որ կհնչի. «Ինչեւէ, հոկտեմբերի 1-ը յոթ սարի հետեւում չէ»:
Զրույցի այլ մանրամասները` տեսանյութում
Նելլի ԳՐԻԳՈՐՅԱՆ
Հ. Գ. Վլադիմիր Պուտինի այցին Երևան պետք է սպասել. այսօր լրագրողների հետ զրույցում ասել է Հայաստանում ՌԴ դեսպան Սերգեյ Կոպիրկինը։ Հարցին՝ կգա՞ Պուտինը Հայաստան, դեսպանը պատասխանել է. «Դուք այլ տեղեկություն ունե՞ք, ես չունեմ»։
