ՀՀ ԱԺ «Լուսավոր Հայաստան» խմբակցության պատգամավոր, ֆինանսավարկային և բյուջետային հարցերի մշտական հանձնաժողովի նախագահ Մանե Թանդիլյանը ՊԵԿ նախագահ Դավիթ Անանյանից այսօր հետաքրքրվեց՝ ինչո՞ւ առողջապահության և աշխատանքի տեսչության լիազորությունները ընդլայնելու փոխարեն այն տվեցին ՊԵԿ-ին:
Դավիթ Անանյանը վստահեցրեց՝ այդ գործառույթը ՊԵԿ-ին չի հանձնվել. «Որպեսզի թյուրըմբռնում չլինի, կա առողջապահության տեսչական մարմին՝ նոր ձևավորված, երեկ պարզեցինք, որ արդեն կա պատրաստված օրինագիծ, որով առողջապահության տեսչական մարմնի լիազորություններն ընդլայնվել են և նա փոխարինելու է նախկինում աշխատանքի տեսչությանը: Այդ պարագայում մենք համաձայնել ենք առաջինից երկրորդ ընթերցմամբ մի փոքր խմբագրել նախագիծը, որով մեզ իրավունք է տրվելու կիրառելու այդ հոդվածը: Գործառույթը մեզ չեն տվել. մենք գործատու-աշխատող հարաբերությունների մեջ չենք մտնում: Մենք օրենսդրական առումով աշխատողներին պաշտպանելու գործառույթ չունենք»:
Մանե Թանդիլյանը կրկին արձագանքեց, թե սխալ ճանապարհով ենք գնացել և ՊԵԿ-ին դարձրել սուպերկառույց. «Ինչո՞ւ չգնացինք տեսչության լիազորությունների ընդլայնման ճանապարհով, որ մենք աշխատողներին չդիտարկեինք ուղղակի հարկ վճարող օբյեկտ: Փոխարենը տեսչությունն արագ տվեցինք ՊԵԿ-ին այդ լիազորությունները՝ նրան դարձնելով սուպերՊԵԿ ու սուպերկառույց, և նա էլ կգնա ու գործատուի և աշխատողի միջև հարաբերություններն իր տեսակետից չճշտի: Մենք սխալ ճանապարհով ենք գնացել»:
Տաթև ՀԱՐՈՒԹՅՈՒՆՅԱՆ
