Aravot.am-ը Հայաստանի պետական տնտեսագիտական համալսարանի ռեկտորի նախկին պաշտոնակատար Ռուբեն Հայրապետյանին խնդրեց մեկնաբանել այն լուրը, որ ոստիկանության կազմակերպված հանցավորության դեմ պայքարի (6-րդ) գլխավոր վարչությունում նյութեր են նախապատրաստվում իր կողմից պաշտոնական լիազորությունների չարաշահման փաստով, եւ որ ինքը, ըստ որոշ տեղեկությունների, բուհի իր մտերիմներին տրամադրել է չնախատեսված ամենամյա վճարովի արձակուրդներ, միանվագ դրամական պարգևատրումներ և լրավարձեր:
«Ցավոք, որոշ «ընկերներ» չափազանց ծանր են տանում ուսանողների և շրջանավարտների այս աննախադեպ սերն ու աջակցությունը և հոգեվարքի մեջ անկարողությունից փորձում են ինձ վնասելու բոլոր հնարավոր մեթոդները: Թեման այնքան անլուրջ է, որ արվել է բացառապես մամուլով բացասական աղմուկ տարածելու համար: Երկար փորփրել են և իրենց գտածը 70-100 հազար դրամի չափի պարգևատրման 4-5 դեպքեր են, և 2 աշխատակցի արձակուրդ, որոնք, միայն իրենց կարծիքով, խախտում է: Դրանով ևս մեկ անգամ հաստատում են, թե որքան մաքուր ենք աշխատել: Աղմուկի հեղինակները ևս շատ լավ գիտեն, թե որքան հեռու է այդ ամենն ինձնից, սակայն երբ մարդը բարոյականության զսպման որևէ ներքին մեխանիզմ չի ունենում, այսպիսի ճղճիմ քայլերը իրականություն են դառնում»,- Aravot.am-ին ասաց Ռուբեն Հայրապետյանը:
Նշենք, որ Shamshyan.com-ի հրապարակած այդ լուրը ոստիկանությունից հաստատել են: Panorama.am-ին ոստիկանության հասարակայնության հետ կապերի վարչությունից մանրամասնեցին, որ ստացած տվյալների համաձայն, Հայաստանի պետական տնտեսագիտական համալսարանի ռեկտորի նախկին պաշտոնակատարը չարաշահելով իր պաշտոնեական լիազորությունները, խախտելով աշխատանքային օրենսգրքի և ԲՈՒՀ-ի կանոնադրության պահանջները՝ իր մտերիմներին տրամադրել է չնախատեսված ամենամյա վճարովի արձակուրդներ, միանվագ դրամական պարգևատրումներ և լրավճարներ, որի հետևանքով վատնվել են խոշոր չափերի գումարներ:
«Վնասի չափը պարզվում է: Նախապատրաստվում են նյութեր»,-ասել են ոստիկանությունից:
Կարդացեք նաև
Գոհար ՀԱԿՈԲՅԱՆ
