ԱՄՆ նախագահ Դոնալդ Թրամփը հայտնել է, որ հեռացնում է Ջոն Բոլթոնին իր ազգային անվտանգության հարցերով խորհրդականի պաշտոնից:
Twitter-ի իր էջում Թրամփը գրել է, որ ինքը, ինչպես նաև իր աշխատակազմի մյուս աշխատակիցները, կտրականապես համաձայն չեն եղել Բոլթոնի բազմաթիվ դատողությունների հետ:
«Ես խնդրել եմ Ջոնին լքել պաշտոնը, և այսօր առավոտյան ընդունել եմ նրա հրաժարականը: Ես շնորհակալություն եմ հայտնում Ջոնին իր աշխատանքի համար: Հաջորդ շաբաթ ես կնշանակեմ ազգային անվտանգության հարցերով նոր խորհրդական»,- գրել է Թրամփը:
Ինքը՝ Բոլթոնը, Twitter-ում գրել է, որ երեկ երեկոյան ինքն է իր հրաժարականն առաջարկել նախագահին, իսկ Թրամփն ասել է. «Արի դա վաղը քննարկենք»:
Կարդացեք նաև
70-ամյա Ջոն Բոլթոնն ԱՄՆ նախագահի՝ ազգային անվտանգության հարցերով խորհրդական էր նշանակվել անցյալ տարվա ապրիլին: Մինչ այդ նա աշխատել էր ՄԱԿ-ում ԱՄՆ մշտական ներկայացուցիչ և պետքարտուղարի օգնական:
Պատրաստեց՝ Վիկտորյա ԱՆԴՐԵԱՍՅԱՆԸ
