Երեկվա պայմանավորվածության համաձայն, ՀՀ 2-րդ նախագահ Ռոբերտ Քոչարյանի աջակիցներն այսօր ժամը 11:00-ին կրկին հավաքվեցին Երեւանի ընդհանուր իրավասության դատարանի Շենգավիթի նստավայրի առջեւ; Նրանք դատավոր Աննա Դանիբեկյանից պահանջում են անհապաղ դատական նիստ հրավիրել եւ քննարկել Սահմանադրական դատարանի որոշումը՝ ազատ արձակել Ռոբերտ Քոչարյանին:
Գագիկ Բաղդասարյանը հայտարարեց, թե հուսով են՝ տիկին Դանիբեկյանը տեղյակ է, թե ինչի են իրենք այսօր հավաքվել դատարանի առջեւ:
Փաստաբան Վահե Եփրիկյանը մեկ անգամ եւս հնչեցրեց իրենց մտահոգությունը, որ Սահմանադրական դատարանի սեպտեմբերի 4-ի որոշումը, թե Քոչարյանը կալանքի տակ է գտնվում մի նորմով, որը հակասահմանադրական է եւ նրա ազատազրկված լինելը բացարձակ ապօրինությունների արդյունք է: «Ուզում եմ հիշեցնել, որ Ռոբերտ Քոչարյանի խափանման միջոցի հարցի քննությանն անհապաղորեն անդրադառնալը ոչ թե մեր ցանկությունն է, այլ՝ ձեր պարտքը: Խնդրում ենք եւ հույս ունենք, որ չեք սպասի մինչեւ սեպտեմբերի 12-ը: Դեռ երեկվանից ահազանգել ենք, որ չենք սահմանափակվելու լոկ կոչերով կամ լոզունգներով: Մենք պատրաստ ենք բոլոր միջոցների կիրառմանը օրինականության շրջանակներում եւ ի վերջո հասնելու ենք ձեր կողմից արդարադատության իրականացմանը: Սա մեր օրինական պահանջն է»,-հայտարարեց նա:
Աշոտ ՀԱԿՈԲՅԱՆ
Կարդացեք նաև
