«Ժողովրդավարական Հայրենիք» կուսակցության սեպտեմբերի 8-ին տեղի ունեցած քաղաքական խորհրդի նիստում ամփոփվեց կուսակցության 22-ամյա գործունեությունը, միաժամանակ, անդրադարձավ 2018թ-ի հեղափոխությունից հետո ներքաղաքական իրավիճակին՝ այն գնահատելով մտահոգիչ։ Ինչը հետևանք է իշխանությունների իրականացրած ո՛չ վճռական, ո՛չ ամբողջական քայլերի, ինչպես նաև անցումային արդարադատության ներդրումից խուսափելու, այդ թվում՝ կառավարման ամբողջ համակարգում վեթինգ չկիրառելու, նախկին հանցագործ բանդայի պարագլուխներին պատասխանատվության չենթարկելու և նրանց թալանը ժողովրդին չվերադարձնելու, այդ թվում՝ գազի և էլեկտրոէներգիայի շուրջ երկու տասնամյակ ուռճացված սակագների հաշվին։
Այնուամենայնիվ, հաշվի առնելով 5-րդ շարասյան ագրեսիվ ակտիվացումը և ռևանշի հնարավոր վտանգը՝ ԺՀԿ-ն շարունակում է աջակցել իշխանություններին և անելու է իրենից կախված հնարավորը՝ կանխելու ռևանշիստական ցանկացած դրսևորում։
Քննարկվեց Ամուլսարի հնարավոր շահագործման հարցը։ ԺՀԿ-ն անընդունելի է համարում հանքարդյունաբերության ոլորտում առկա վիճակը, մասնավորապես՝ Ամուլսարի վերաբերյալ քննչական կոմիտեի որոշումը այլ բան չէր, քան արդարացնել նախորդ հանցագործ, կոռումպացված ռեժիմը, միաժամանակ իշխող քաղաքական ուժի ներկայացուցիչների պատասխանատվությունից խուսափելը պետք է ահազանգ հանդիսանա Նիկոլ Փաշինյանին։
ԺՀԿ-ն դեմ է Ամուլսարի շահագործմանը, միաժամանակ առաջարկում է լյուստրացիայի ենթարկել, բացահայտել բոլոր գործող հանքերի իրական տերերին, և տասնամյակներ շարունակ ընդերքը հոշոտած և ապօրինի կուտակած հարստությունը վերադարձնել ժողովրդին։
Կարդացեք նաև
Կուսակցությունը քննարկեց և վերանայեց Արցախի հարցում իր 1997-99 թթ-ի դիրքորոշումը և հաշվի առնելով Ադրբեջանի վերջին տարիների կոշտ ռազմատենչ դիրքորոշումը՝ ԺՀԿ-ն իր աջակցությունն է հայտնում իշխանություններին՝ Արցախը Հայաստանին վերամիավորումը օրակարգային հարց դարձնելուն, և փոխզիջումը կարող է լինել՝ Ադրբեջանի կողմից պատերազմն սկսելու դեպքում նոր ազատագրված տարածքների շուրջ հնարավոր բանակցությունները, որովհետև ներկայիս ազատագրված տարածքների ցանկացած զիջում վտանգում է Հայաստանի, այդ թվում՝ առաջին հերթին Արցախի անվտանգությանը։
Հաշվի առնելով վերոշարադրյալը՝ կուսակցության քաղաքական խորհուրդը որոշեց կուսակցության առաջիկա համագումարին ներկայացնել կուսակցության զինանշանը /լոգոն/ փոխելու առաջարկը, Հայաստանի Հանրապետությունը ներկայացնող ներկայիս քարտեզը փոխարինել Հայաստանի, Արցախի և ազատագրված տարածքների միասնական քարտեզով։
«Ժողովրդավարական Հայրենիք »կուսակցության
քաղաքական խորհուրդ
