ՀՀ Ազգային ժողովի յոթերորդ գումարման երրորդ նստաշրջանի առաջին նիստին խորհրդարանն ընդունեց մի շարք օրենքի նախագծեր, մասնավորապես կուտակային կենսաթոշակային օրենքի նախագիծն ընդունվեց առաջին ընթերցմամբ, «Հայաստանի Հանրապետության եւ Դանիայի Թագավորության միջեւ եկամուտների եւ գույքի կրկնակի հարկումը բացառելու եւ հարկումից խուսափելը կանխելու մասին» կոնվենցիան վավերացնելու մասին որոշումը, «ՀՀ Ազգային ժողովի աշխատակազմում պետական ծառայության մասին» օրենքում փոփոխություն կատարելու մասին» նախագծերը ընդունվեցին:
Խորհրդարանը մերժեց ԲՀԿ-ի կողմից ներկայացված Հարկային օրենսգրքում լրացումներ կատարելու մասին որոշումը, ՀՀ ԱԺ ԲՀԿ խմբակցության պատգամավոր Միքայել Մելքումյանի՝ հարկային օրենսգրքում փոփոխություններ կատարելու մասին նախագիծը:
Միքայել Մելքումյանը մինչ քվեարկությունը հայտարարեց. «1997-ի հուլիսի 1-ից մեր երկրում սահմանի վրա ԱԱՀ է գանձվում: 22 տարի բիզնեսը ձրի կամ անտոկոս վարկավորում է պետությանը: Այն, որ հարկային ծառայության գործիքները կատարելագործվում են, քայլ առ քայլ պետք է սահմանին ԱԱՀ հարկելուց հրաժարվենք, ինչպես ամբողջ աշխարհում է: Բիզնեսը պարտավոր չէ ձրի վարկավորելու պետությանը»:
Կարդացեք նաև
ՀՀ ԱԺ տնտեսական հանձնաժողովի նախագահ, «Իմ քայլը» խմբակցության պատգամավոր Բաբկեն Թունյանը հիշեցրեց՝ այս նախագծին հանձնաժողովը դրական եզրակացություն է տվել վերապահումով, բայց այս պահին իրենց դիրքորոշումը ավելի շատ դեմ է, քան կողմ: Բաբկեն Թունյանը խնդրեց պատգամավորներին քվեարկության ժամանակ այդ հանգամանքը նկատի ունենալ:
Նախագիծը ձայների 41 կողմ և 52 դեմ հարաբերակցությամբ չընդունվեց:
Տաթև ՀԱՐՈՒԹՅՈՒՆՅԱՆ
