Հայաստանում ստեղծվել է նոր առցանց համահայկական մեդիա հարթակ՝ Iammedia.am, որը շուտով կգործի ամբողջ թափով: Ինչպես հայտարարեցին թիմի անդամները՝ խորհրդի նախագահ Վաչե Քավլաքյանը, գլխավոր տնօրեն և համահիմնադիր Ռուզաննա Ղազարյանը, գլխավոր խմբագիր Լիանա Ադամյանը, ստեղծագործական տնօրեն Ժակ-Հակոբ Պապիկյանը եւ մյուսները, Iammedia-ն թվային հրատարակման հարթակ է այն մարդկանց համար, որոնք հետաքրքրված են որակյալ բովանդակության ստեղծմամբ, զարգացմամբ և օգտագործմամբ:
Ժակ-Հակոբ Պապիկյանը Iammedia-ի ոչ պաշտոնական շնորհանդեսին կատակով ասաց, որ ըստ ժանրի կանոնների, որպես միջոցառման վարող, գուցե պետք է կրեր փետրազարդ գլխարկ, սակայն դա չկա, քանի որ լուրջ թեմայի է վերաբերվում խոսակցությունը: Նա նշեց, որ Iammedia՝ «ես եմ մեդիան» անվանումը պատահական չի ընտրվել, որովհետեւ յուրաքանչյուր անձ այսօր տեղեկատվություն փոխանցող է: Ասաց, որ իրենց նպատակն է համակարգել այդ տեղեկատվությունը, ստեղծել եռալեզու համահայկական հարթակ եւ յուրաքանչյուրին հնարավորություն տալ թղթակցելու Iammedia-ին:
Կարդացեք նաև
Վաչե Քավլաքյանը պատմեց, որ Ռուզաննա Ղազարյանի հետ երազանք ունեին յուրօրինակ ինտերնետային հեռուստաալիք ստեղծել, եւ երկու տարի անց իրենց թիմի երազանքն արդեն իրականություն է: «Iammedia-ի թիմ ասելով՝ մենք նկատի ունենք բոլոր հայերին»,-ընդգծեց Քավլաքյանը, հավելելով, որ Iammedia կարող է դառնալ յուրաքանչյուրի մեդիան, քանի որ ամեն ոք կարող է թղթակցել իրենց:
Ռուզաննա Ղազարյանը նշեց, որ ոմանք թերահավատությամբ էին վերաբերվում նոր մեդիա հարթակ ստեղծելու գաղափարին, կային մարդիկ էլ, որ հարցնում էին, թե իրենք ում քաղաքական շահն են սպասարկելու.«Իրականում Iammedia-ն որեւէ մեկի քաղաքական շահը չի սպասարկելու, փորձելու է ստեղծել յուրօրինակ բովանդակություն եւ դիմագծով տարբերվել եղած մեդիաներից»:
Immedia-ի անդամները նշեցին, որ խոսքի ազատությունը իրավունք է, ոչ թե արտոնություն: Խոստացան լրագրողական չափանիշներին համապատասխանություն նաեւ, որ յուրաքանչյուրն այնտեղ կգտնի իրեն հարազատ ինչ-որ բան:
Գոհար ՀԱԿՈԲՅԱՆ
