Դատաիրավական բարեփոխումների նախագծով նախատեսված է ստեղծել փաստահավաք հանձնաժողով, որը զբաղվելու է 1991 թվականից ի վեր ընտրական կեղծիքների վերհանմամբ եւ արդարության հաստատմամբ: Իրավապաշտպան Ավետիք Իշխանյանն Aravot.am-ի հետ զրույցում ողջունելի համարեց, որ մեկնարկը տրվելու է 1991 թվականից, քանի որ Հայաստանում ամեն ինչ իր կարծիքով, չափից ավել քաղաքականացված է եւ կախված քաղաքական որեւէ թիմի քարոզչությունից, ժամկետներ են նշվում. «Համենայնդեպս, վերջերս անընդհատ նշվում է 20 տարի, կարծես 1998 թվականից առաջ մենք դրախտում ենք ապրել»:
«Ճշմարտության» այդ հանձնաժողովն ավելի լայն լիազորություններով է օժտված լինելու, ուստի, մեր զրուցակցի մոտ հարց է առաջանում`ինչպե՞ս է ստեղծվելու այդ հանձնաժողովը, ովքե՞ր են լինելու դրա անդամները: Համընդհանուր վստահություն ներշնչող անդամներ, ըստ նրա, մեր հասարակությունում դժվար կլինի գտնել, քանի որ հասարակությունը պառակտված է, մոտեցումները հաճախ ծայրահեղ են: Բացի այդ, հանձնաժողովի ներկայացրած արդյունքները հաստատելու են խորհրդարանական մեծամասնության անդամները`ցուցումով. «Ինչպես վարչապետը կասի, այնպես էլ նրանք կընտրեն»:
«Հնարավո՞ր է Հայաստանում այսօր ընտրել 20 հոգի, որոնք լինեն գրագետ եւ կիրթ մարդիկ, զերծ լինեն քաղաքական ուղղություններից զերծ մարդիկ»,- հռետորական հարց է հնչեցնում մեր զրուցակիցը, բայց ինք էլ դրան պատասխանում է`տեսականորեն, գուցե հնարավոր է, բայց կասկածում է, որ այդ սկզբունքը գործնականում կպաշտպանվի: Այս համատեքստում զուգահեռ է անցկացնում ՍԴ-ի շուրջ ստեղծված իրավիճակի հետ:
Ավետիք Իշխանյանի համար անառարկելի է, որ ՍԴ գործող անդամները ցուցումով են նշանակվել, բաց նաեւ փաստ է, որ ՀՀ նախագահի ներկայացրած երկու`իր կարծիքով, չեզոք թեկնածությունները «Իմ քայլի» կողմից մերժվեցին. «Ի վերջո, ընտրվեց անունով իրավաբան, բայց իրականում քաղաքական գործիչ, որի համակրանքներն ու հակակրանքները հստակ են բոլորի համար»:
Կարդացեք նաև
Խոսքը, հիշեցնենք, Վահե Գրիգորյանի մասին է:
Մանրամասները`տեսանյութում
Նելլի ԳՐԻԳՈՐՅԱՆ
