Կառավարության կողմից նախաձեռնված հարկային փոփոխություններով ներդրվում է միկրոձեռնարկատիրության համակարգ, համաձայն որի` տարեկան մինչեւ 24 մլն դրամ շրջանառություն ունեցող սուբյեկտներն ազատվում են հարկերից: Օրենքով սահմանված է բացառությունների ցանկը, ովքեր չեն կարող համարվել միկորձեռնարկատիրության սուբյեկտ:
Նշյալ ցանկում են ներառված Երեւան քաղաքում, առևտրի կենտրոններում և տոնավաճառներում առևտրով զբաղվողները հանրային սննդի ոլորտում գործունեություն իրականացնողները:
Այս բացառությունները չունեն որևէ տրամաբանություն, քանի որ շրջանառության սահմանափակումն արդեն իսկ սահմանափակում է սուբյեկտի շահույթի ծավալը եւ, հաշվի առնելով, որ այս համակարգի ներդրման նպատակներից մեկը սոցիալական աջակցությունն է միկրոձեռնարկատիրությամբ զբաղվողներին, անհասկանալի է Երեւան քաղաքում առևտրական գործունեության համար բացառության կիրառումը, քանի որ այդ ոլորտը Երեւանում չունի որեւէ հավելյալ շահույթ ստանալու հնարավորություն, քան մարզերում: Ավելին, հաշվի առնելով խոշոր խանութների, սուպերմարկետների առկայությունն ու մեծ մրցակությունը, շատ հաճախ մայրաքաղաքում նույն բիզնեսն ունի ավելի փոքր շահութաբերություն:
Մյուս կողմից, Երեւանում աղքատության մակարդակը չի զիջում բազմաթիվ մարզերում աղքատության մակարդակին, եւ վաստակած նույն գումարը Երեւանում ունի ավելի քիչ գնողունակություն՝ հատկապես առաջին անհրաժեշտության ապրանքների ձեռքբերման մասով:
Կարդացեք նաև
Հանրային սննդի պարագայում սահմանափակման կիրառումը հանրապետության ամբողջ տարածքում ավելի անհասկանալի է, քանի որ մարզերում հանրային սննդի բազմաթիվ օբյեկտներ նաեւ զբոսաշրջության զարգացման համար հանդիսանում են ենթակառուցվածքներ և, ի տարբերություն առևտրային գործունեության, հանրային սննդի ոլորտը ներգրավում է ավելի շատ աշխատակիցներ, որը սոցիալական աջակցության տեսանկյունից խրախուսման ավելի մեծ կարիք ունի:
Հաշվի առնելով վերոնշյալը՝ ներկայացրել եմ Հարկային օրենսգրքում փոփոխություններ կատարելու առաջարկ նշված երկու բացառությունները հանելու նպատակով, ինչը հնարավորություն կտա իրոք ամբողջական աջակցություն ցուցաբերել միկրոբիզնեսին՝ ինչպես սոցիալական, այնպես էլ բիզնեսի զարգացման տեսանկյունից:
Մանե Թանդիլյան
ՀՀ ԱԺ ֆինանսավարկային և բյուջետային հարցերի մշտական հանձնաժողովի նախագահ
