Սեպտեմբերի 5-ին «Արմենպրեսում» կայացած ասուլիսում ՀՀ-ում Իտալիայի արտակարգ և լիազոր դեսպան Վինչենցո դել Մոնակոյին լրագրողներից մեկը Հայաստան-Իտալիա ֆուտբոլային հանդիպումից հարցրեց: Դեսպանն ասաց, որ ինքն անպայման ներկա կլինի մարզադաշտում: Ինչ վերաբերում է այն հարցին, թե ում է երկրպագելու, դեսպանը կատակով ասաց, որ այդ հարցին կպատասխանի փաստաբանի ներկայությամբ. «Քանի որ եթե սխալ պատասխանեմ, չեմ կարող այստեղից դուրս գալ, ճիշտ պատասխանեմ, չեմ կարող տուն վերադառնալ»:
Ապա հավելեց. «Կատակը մի կողմ, բայց ֆուտբոլում գործում է «Թող հաղթի լավագույնը» օրենքը: Իրականում սա ոչ միայն սպորտային հանդիպում է, այլ մի հսկա ցուցափեղկ է, որը ցույց է տալու Իտալիայում եւ ընդհանրապես Եվրոպայում գտնվող տասնյակ միլիոնավոր հեռուստադիտողներին, որոնք հետեւելու են խաղին` Նոր Հայաստանը: Պետք է նշեմ, որ Հայաստանի եւ Իտալիայի միջեւ կապերը շատ դինամիկ են զարգանում: Երեւի կհիշեք, որ անցյալ տարի Իտալիայի նախագահի պետական այցը եղավ Հայաստան: Այդ ժամանակվանից մինչ այսօր 2 անգամ եղել են խորհրդարանական պատվիրակությունների այցեր Հայաստան` տարբեր նախագծերով»:
Դեսպան Վինչենցո դել Մոնակոն հիշեց նաեւ ամռանը կայացած հայ-իտալական բիզնես-համաժողովը, որին մասնակցում էր ՀՀ վարչապետ Նիկոլ Փաշինյանը: Նա ընդգծեց, որ Իտալիայի եւ Հայաստանի արտգործնախարարները եւս քանիցս հանդիպել են:
Իբրեւ կարեւոր նախագծեր դեսպանը առանձնացրեց Երեւանի մոտակայքում Ռենկոյի կողմից կառուցվող ՋԷԿ-ը, իսկ մյուսը` իտալական կերամիկայի արտադրությունն է Աբովյան քաղաքում:
Կարդացեք նաև
Գոհար ՀԱԿՈԲՅԱՆ
