Այսօր կառավարության նիստում որոշում կայացվեց Մարտի 1-2-ին տուժած քաղաքացիներին աջակցության համար 720 միլիոն դրամ գումար հատկացնել արդարադատության նախարարությանը:
Կառավարության որոշմամբ հաստատվել է 2008 թվականի մարտի 1-2-ը Երեւան քաղաքում տեղի ունեցած իրադարձությունների ժամանակ տուժած անձանց աջակցության ձեւը եւ չափը: Աջակցությունը տրամադրվելու է միանվագ դրամական օգնության ձեւով՝
1) ստացած վնասվածքի պատճառով զոհված (մահացած) անձի` Հայաստանի Հանրապետության քրեական դատավարության օրենսգրքով նախատեսված կարգով իրավահաջորդի կարգավիճակ ունեցող անձին՝ 30 միլիոն դրամ.
2) առողջությանը ծանր վնաս հասցված անձին՝ 15 միլիոն դրամ.
Կարդացեք նաև
3) առողջությանը միջին ծանրության վնաս հասցված անձին՝ 5 միլիոն դրամ:
Վարչապետ Նիկոլ Փաշինյանն ասաց, որ սա ոչ թե փոխհատուցում է, այլ աջակցություն է. «Ու իմ դիրքորոշումն այն է, որ հայտնի հանգամանքների բերումով՝ մենք փոխհատուցման հարցի վերաբերյալ որոշումներ պիտի կայացնենք ՄԻԵԴ-ի կայացրած որոշումների հիման վրա:
Փաշինյանի ներկայացմամբ՝ շատ կարեւոր է, որ այս հարցում որոշումները կայացվեն օբյեկտիվ. «Բայց քանի որ չգիտենք` երբ կկայացվեն որոշումներ ու չստացվի այնպես, որ մեր կառավարությունը որեւէ միջոց չի ձեռնարկում աջակցություն ցույց տալու համար, հիմա մենք սա կայացնում ենք Ազգային ժողովի օրենքի հիման վրա, իսկ թեման ամբողջությամբ կփակենք ՄԻԵԴ-ի որոշման հիման վրա»:
Արդարադատության նախարար Ռուստամ Բադասյանն էլ նշեց՝ գումարի տրամադրման չափը պայմանավորված է հատուկ քննչական ծառայությունից ստացված տվյալներով՝ 2008 թվականի մարտի 1-2-ը Երեւան քաղաքում տեղի ունեցած իրադարձությունների ժամանակ զոհվել է 10 մարդ, առողջությանը ծանր վնաս է հասցվել 10 մարդու եւ միջին ծանրության վնաս է հասցվել 54 անձի:
Նելլի ԲԱԲԱՅԱՆ
Լուսանկարում՝ Նիկոլ Փաշինյանը 2019-ի մարտի 1-ին հիշատակի արարողության ժամանակ:
