«Եթե շրջափակեն դատարանը՝ գլոբալ հարց է: Իմ խորին համոզմամբ՝ արդարադատության նկատմամբ ցանկացած ճնշում՝ դատապարտելի է եւ շրջափակել դատարանը, եւ միտինգային, ամբոխային արդարադատությունն ինձ համար շատ անհասկանալի է, անթույլատրելի է»,-այսօր լրագրողների հետ հանդիպմանն ասաց բարձրագույն դատական խորհրդի նախագահ Ռուբեն Վարդազարյանը՝ պատասխանելով լրագրողի հարցին՝ թե ինչ գնահատական կտա դատարանների մուտքերը արգելափակելու ցույցին:
Վարդազարյանը մի օրինակ բերեց. «Երբ քննվում էր ՊՊԾ-ի գործը՝ մի խումբ անձինք կանգնած պաշտպանում էին ՊՊԾ-ի գրավման գործով ամբաստանյալներին, մյուսը՝ նրանց դեմ: Ես գտնում եմ, որ սա ճնշում է դատարանի վրա: ԲԴԽ շենքի առաջ էլ վերջերս փորձել էին բողոքի ցույց կազմակերպել: Գտնում եմ՝ այն դատարանը կամ դատավորն, որն արդարադատություն կիրականացնի կախված դատարանի առաջ բողոքի ակցիայի քանակից, որակից, հնչեցված բառերից, այդ դատարանը կլինի սխալ: Չեմ ընդունում, որ դատավորը կարող է ամբոխի պահանջով արդարադատություն իրականացնի: Մենք 21-րդ դարում ենք, այդ Լինչի դատարան եւ նման մեխանիզմներն անթույլատրելի են»:
Դիտարկմանը՝ եթե անգամ այդ ամբոխին վարչապետն է ուղղորդել, նո՞ւյն կարծիքին է, Վարդազարյանը պատասխանեց. «Վստահ եմ, որ դատավորը դատարանի դիմաց ցանկացած բողոքի ցույցից իրավունք չունի ճնշվի, արդարադատությունն իրականացնի՝ կապված այդ ժողովրդի քանակից»:
Նելլի ԲԱԲԱՅԱՆ
