«Ես գտնում եմ, որ բարեվարքության ստուգման գործընթացը պետք է սկսել հենց ինձանից»,-այսօր այս մասին լրագրողների հետ հանդիպման ժամանակ ասաց բարձրագույն դատական խորհրդի նախագահ Ռուբեն Վարդազարյանը: Նա նշեց՝ այնուհետ այդ գործընթացը կանցնեն ԲԴԽ անդամները, հետո դատավորները. «Ինչպես է դա մեկնարկելու՝ այս պահին դժվարանում եմ ասել՝ ժամկետի առումով, քանի որ կարգավորումները դեռ ընթացքի մեջ են, քննարկման փուլում են, բայց որ մոտ ժամանակներս դա լինելու է՝ վստահ եմ»:
Վարդազարյանի կարծիքով՝ դատաիրավական ոլորտի բարեփոխումների մասին ռազմավարությունը բավականին հավակնոտ է. «Գնահատում եմ դրական, բավականին ծավալուն աշխատանք է կատարված, եւ եթե բոլոր շահագրգիռ կողմերը լինեն հետեւողական եւ քայլ առ քայլ փորձեն իրականություն դարձնեն ռազմավարությունում նշված ծրագրերը, մենք որոշ ժամանակ հետո կունենանք իրականում լավ, վստահելի դատաիրավական համակարգ»:
ԲԴԽ նախագահը վստահեցրեց՝ իր ընտրվելուց հետո բարձրագույն դատական խորհրդում աշխատանքներն ընթանում են բավականին դրական ու կառուցողական մթնոլորտում, ԲԴԽ բոլոր անդամները զինված են համբերատարությամբ, պատրաստ են աշխատել, իրենց ունակություններն ու հնարավորությունները ներդնեն հանուն Հայաստանի Հանրապետության. «Ծանրաբեռնված աշխատանք է ԲԴԽ-ում։ Գրեթե ամեն օր ունենում ենք քննարկումներ։ Միակ բանը, որ կարող եմ այս պահին արձանագրել ու հայտնել դատական բարձրագույն իշխանության դիրքորոշումը, հետեւյալն է՝ այսուհետ խորհուրդը լինելու է չափազանց բաց ու թափանցիկ, ցանկացած պահի պատրաստ ենք պարզաբանել ու պատասխանել բոլոր լրագրողների բոլոր հարցերին»:
Նելլի ԲԱԲԱՅԱՆ
