Կրթական համակարգում այս տարի ավելացավ եւս մի մասնավոր կրթօջախ. Ավան վարչական շրջանում «Գազպրոմ Արմենիա» ՓԲԸ-ի կողմից կառուցվել է ուսումնամարզական համալիր, որը զբաղեցնում է ավելի քան 29 000 քառ. մ տարածք եւ բաղկացած է երեք՝ ուսումնական, մարզաառողջարարական, հանգստի գոտիներից։ Ուսումնական գոտում կգործեն մինչեւ 700 աշակերտի համար նախատեսված դպրոց, մանկապարտեզ՝ 190 երեխայի համար, ինչպես նաեւ 25 մ երկարությամբ փակ լողավազան, ֆուտբոլի եւ բասկետբոլի մինի դաշտեր, փակ սահադաշտ։
Համալիրի հանրային կապերի գլխավոր մասնագետ Անի Աբրահամյանն ընդգծում է՝ սա մասնավոր դպրոց է՝ 8:30-17:30 աշխատանքային ժամերով, որի ընթացքում երեխաներն անցնում են ողջ դասապրոցեսն ու դասապատրաստումը։
«Շենքային պայմաններն անկրկնելի են, որովհետեւ նման ենթակաոուցվածքներով դպրոց գտնել հնարավոր չէ։ Մեր բոլոր դասարանները կահավորված են սմարթ-գրատախտակներով, նորագույն սարքավորումներով։ Դպրոցն ունի սահադաշտ, լողավազան, մարզական, սպորտային համալիր, ինչպես նաեւ բոլոր խմբակներից օգտվելու հնարավորություն… Դպրոցի հիմքում հայկական հանրակրթական ծրագիրն է։ Դպրոցում առաջին դասարանից սկսած՝ անցնում ենք նաեւ օտար լեզուներ՝ ռուսերեն, անգլերեն»,- ասում է Աբրահամյանն ու հավելում, որ երեխաներն այդ ընթացքում ապահովվում են նաեւ 3-անգամյա սննդով։
Ինչ վերաբերում է մանկավարժներին, ապա նրանց ընտրել են մրցութային հիմունքներով։ Նրանք բոլորը գործող մասնագետներ են՝ հաշվի առնելով նրանց մասնագիտական եւ անձնային որակները. «Դասապատրաստումը պետք է փակի երեխաների բոլոր կարիքները, այսինքն՝ եթե երեխան թերանում է ինչ-որ առարկայից, այստեղ դասապատրաստման ընթացքում պետք է դա արվի, բացառվում է որեւէ օղակում լրացուցիչ պարապմունք, ամեն ինչ արվելու է տեղում՝ մեր մասնագետների ու դասապատրաստողների միջոցով»։
Կարդացեք նաև
Այս համալիր ծառայությունների համար ծնողը տարեկան վճարում է 1 մլն 500 հազար դրամ:
«Բոլոր ուսումնական նյութերը, այդ թվում՝ գրքերը, ամբողջությամբ մենք ենք տրամադրում։ Այստեղ մուտքն ու ելքը չիպերով են, որոնք էլի դպրոցն է տրամադրում, երեխաներն անհատական պահարաններ ունեն, որտեղ թողում են իրենց բոլոր իրերը»։
Սոնա ԱԴԱՄՅԱՆ
Հոդվածն ամբողջությամբ կարող եք կարդալ «Հրապարակ» թերթի այսօրվա համարում:
