Ազգային ժողովի տարածաշրջանային եւ եվրասիական ինտեգրման հարցերի մշտական հանձնաժողովի նիստին այսօր մասնակցում էին նաեւ ԵԱՏՄ անդամ պետություններում, Իրանում, Չինաստանում, Մոնղոլիայում Հայաստանի դեսպանները: Հրավերին արձագանքել էին ՌԴ-ում, Վրաստանում, Իրանում ՀՀ դեսպանները: Նիստին մասնակցում էր նաև փոխարտգործնախարար Շավարշ Քոչարյանը։
Հանձնաժողովի նախագահ Միքայել Մելքումյանն ասաց, որ դեսպաններին հանձնաժողովի նիստին հրավիրելու նպատակն է`քննարկել եւ հասկանալ, թե ինչո՞ւ են շատ հարցեր դանդաղ առաջ գնում. օրինակ, հայկական վարորդական իրավունքների գործածման խոչընդոտները Ռուսաստանում, ավտոներկրողների սպասողական վիճակին վերաբերվող հարցեր եւ այլն: Պատգամավորին հետաքրքիր էր` Հայաստանին տրված հինգ տարվա արտոնության ժամկետը կերկարացվի՞, որպեսզի հայ ավտոներկրողները կարողանան էժան գնով մեքենաներ բերել արտասահմանից եւ ավելի ցածր գնով մաքսազերծել։ Քննարկման ընթացքում պարզ դարձավ, որ ԵԱՏՄ երկրներում դժվար թե համաձայնեն Հայաստանին տրված արտոնության ժամկետի երկարացմանը, քանի որ դա ուղղակի կհակասի իրենց քաղաքացիների շահերին:
ՀՀ փոխարտգործնախարարն անդրադարձավ հարցին, թե ինչպե՞ս է Հայաստանն օգտվում ԵԱՏՄ-ի, ԵՄ-ի, ԱՄՆ-ի հետ տարբեր մակարդակների համաձայնագրերի արտոնություններից։ Մասնավորաբար, ԵԱՏՄ-ի համաձայնագրից ՀՀ-ի օգուտների մասով, նա ասաց. «Մասամբ դա նաև պայմանավորված է այն ընկալումով, որ մեր համար ԵԱՏՄ-ն ոնց-որ մի հատ օտար մարմին է, որից մենք մի բան պիտի պոկենք։ Մենք պետք է գիտակցենք, որ բա միակ կառույցն է, որտեղ մենք հանդիսանում ենք լիարժեք տեր, ինչպես որ մյուս պետությունները։ Այսինքն` մենք 5-ից մեկն ենք, որ որոշումներ է կայացնում։ Առանց մեզ այնտեղ որևէ որոշում չի կարող կայացվել»,- ասաց Քոչարյանը` հավելելով, որ հայկական կողմը ԵԱՏՄ-ում ունի զգալի ներկայացվածություն եւ կարող է իր շահերը առաջ մղել։
Նելլի ԳՐԻԳՈՐՅԱՆ
