Քաղաքագետ Աղասի Ենոքյանի կարծիքով՝ այս օրերին փորձ է արվում լարվածությունը Հայաստանից տեղափոխել Արցախ: «Հենարան» մամուլի ակումբում լրագրողների հետ հանդիպմանը նա նկատեց, որ պատմության մեջ առաջին անգամ ՀՀ-ն դրամաշնորհներ է հատկացնում ՀԿ-ներին, որ դիտարկեն Արցախում ընտրությունները. «Հայաստանը երբեք կասկածի տակ չի առել Արցախում եղած ընտրությունները, իսկ հիմա փորձում է օգտագործել լծակներ տեղում ընտրությունները դիտարկելու համար: Դրա հետ եղավ ֆեսյբուքային, մամուլային մենամարտ Վիտալի Բալասանյանի և ՀՀ իշխանությունների միջև: Այսպիսի զարգացումներ են տեղի ունենում, որոնց ճակատագիրը դեռևս անհայտ է: Պարզ չէ՝ մինչև ուր կգնան ՀՀ իշխանությունները և մինչև ուր կդիմադրեն Արցախի ներկայացուցիչները»:
Հարցին՝ Արցախում ընտրություններին դիտորդական առաքելության իրականացումը նշանակում է Արցախի ներքին գործերին միջամտությո՞ւն, Աղասի Ենոքյանը պատասխանեց. «Համարում ենք, որ ՀՀ-ն անկախ երկիր է, Արցախն անկախ երկիր է, առավել ևս Արցախի կողմից չի եղել խնդրանք, որ ՀՀ-ն նման դիտորդական առաքելություն կատարի»: Աղասի Ենոքյանը փաստեց՝ այս ամբողջ ընթացքում ՀՀ-ի և Արցախի ղեկավարություններն ունեցել են նույն գենեզիսը, արցախյան շարժումով սերված: Հիմա ՀՀ-ում եկել է մի իշխանություն, որն այդ շարժման բնական շարունակությունը չէ, ու այս առումով կա որոշակի ճանաչողական, աշխարհայացական տարբերություն, չկա ամբողջական հարմոնիա այս երկու ղեկավարությունների միջև:
Այն հակադարձմանը՝ ի՞նչ խնդիր կա, որ ՀՀ-ն դիտորդական առաքելություն պետք է իրականացնի Արցախում ընտրությունների ժամանակ, մանավանդ, որ ՀՀ-ն Արցախի անվտանգության երաշխավորն է և եթե, օրինակ, գործը գնա ՄԻԵԴ, Հայաստանն է պատասխան տալու, Աղասի Ենոքյանը պատասխանեց. «Բոլոր տիպի եվրոպական, միջազգային դիտորդական առաքելությունների ժամանակ լինում է հրավեր այն երկրի կողմից, որտեղ իրականացվում են այդ առաքելությունները: Տվյալ դեպքում Արցախի կողմից չի եղել նման հրավեր. ՀՀ-ն ինքն է նախաձեռնել այդ դիտորդական առաքելությունը: Սա էական տարբերություն է»:
Աղասի Ենոքյանի կարծիքով՝ ՀՀ իշխանություններն Արցախում ունեն մի քանի թեկնածուներ. «ՀՀ իշխանություններն ունեն թեկնածուներ. մի քանիսն են, որոնք այս ընթացքում ամեն մեկն իր ֆունկցիան է կատարելու, վերջում բոլորը միաձուլվելու են մեկ թեկնածուի մեջ»:
Կարդացեք նաև
Ըստ քաղաքագետի՝ այսօր ներքաղաքական կյանքում ընթացող գործընթացները իրական, թե միֆական, թեժ աշնան կարգախոսով են գնում. «Մի կողմից ընդդիմությունը հայտարարում է, թե լինելու է թեժ աշուն, և ինքը դառնալու է ընդդիմություն, քանի որ հիմա չունենք ընդդիմություն, իսկ իշխանությունն էլ աշխատում է դա թույլ չտալ: Ինչո՞ւ պետք է լինի թեժ աշուն. կարծես պարզ է՝ պրոցեսները ՀՀ-ում չեն գնում ցանկալի ուղղությամբ. հասարակական դժգոհություն է հասունանում»:
Աղասի Ենոքյանը նկատեց՝ իշխանությունները չկարողացան անհրաժեշտ հնչեղություն տալ Գագիկ Խաչատրյանի ձերբակալությանը: Նա հարցրեց՝ այս մեկուկես տարին իշխանություններն ինչո՞ւ քայլեր չէին անում, որ հարստությունները հետ բերեին, պարզեին դրանց աղբյուրները: Ըստ նրա, եթե մինչև հիմա չեն արել և հենց հիմա են կալանավորում, ուրեմն հատուկ նպատակ են հետապնդում:
Տաթև ՀԱՐՈՒԹՅՈՒՆՅԱՆ
