Ըստ պատգամավորի՝ Ամուլսարի հարցով որոշման կայացումը գտնվում է
ժողովրդի վստահության քվեն վայելող, նրա շահերը պատշաճ սպասարկող մարմինների տիրույթում։
ՀՀ ԱԺ «Իմ քայլը» խմբակցության պատգամավոր Անուշ Բեղլոյանը «Առավոտի» հետ զրույցում անդրադարձավ այս օրերին շրջանառվող մի շարք հարցերի:
– Տիկին Բեղլոյան, կցանկանայինք իմանալ Ձեր կարծիքը՝ արդյոք Ամուլսարի հարցը հանրաքվեով որոշելը նպատակահարմա՞ր է, ինչպես առաջարկում է Դաշնակցությունը։
-ՀՀ քաղաքացիները ժողովրդավարական եւ արդար ընտրություններով իրենց քվեն շնորհել են ներկա իշխանությանը՝ լիազորելով Հայաստանի ժողովրդի շահերից բխող որոշումներ կայացնել: Ամուլսարի խնդիրը նախորդ ռեժիմի ծանր ժառանգությունն է, եւ դրա լուծումը պահանջում է բազմաթիվ գործոնների ուսումնասիրություն, որոնց թվում են Հայաստանի տնտեսական, սոցիալական, բնապահպանական անվտանգության հարցերը, հետեւաբար որոշման կայացումը գտնվում է ժողովրդի վստահության քվեն վայելող, նրա շահերը պատշաճ սպասարկող մարմինների տիրույթում։
Կարդացեք նաև
– Ի՞նչ եք կարծում, Ամուլսարի հարցով ճիշտ չի՞ լինի, որ իշխող ուժի խորհրդարանական խմբակցությունը դիրքորոշում հայտնի։
-Հարցը գտնվում է կառավարության տիրույթում, եւ, ինչպես արդեն նշել եմ, պետք է լուծվի բազմաթիվ մասնագիտական նկատառումների հիման վրա։ Այս պարագայում քաղաքական դիրքորոշում հայտնելը, ըստ իս, չի նպաստում հարցի օբյեկտիվը լուծմանը։
– Քաղաքական տարբեր ուժեր հաճախ են խոսում թեժ քաղաքական աշնան մասին. նման նախադրյալներ տեսնո՞ւմ եք:
-Ես մոտ 25 տարի է՝ աշխատանքի բերումով հետեւել եմ հայկական քաղաքական դաշտին, եւ համարյա ամեն տարի ամռանը խոսվում է «թեժ աշնան» մասին, իսկ ձմեռը՝ «թեժ գարնան». այս տարվա խոսակցությունները բացառություն չեն։
-Կխնդրեի ներկայացնել Ձեր կարծիքը Ամուսարի խնդրի մասին: Եթե պետք լինի՝ կկանգնե՞ք ակտիվիստների կողքին,՝ մանդատը վայր կդնե՞ք:
-Որպես իշխանության ներկայացուցիչ պարտավոր եմ լսել բոլոր շահագրգիռ կողմերի կարծիքները եւ կայացնել այնպիսի որոշումներ, որոնք բխում են Հայաստանի ողջ ժողովրդի շահերից` պահպանելով անաչառություն եւ սթափ դատողություն, ինչը բացառում է շահերի պաշտպանության արշավներ իրականացնող կողմերի գործողությունների մեջ ներառվելը։
– Ռուսական մամուլում հայտնվել է «Փաշինյանի վարկանիշը լռվել է Ամուլսարի հանքավայրի եզրին» վերնագրով եւ բովանդակությամբ հրապարակում: Իրո՞ք Նիկոլ Փաշինյանի վարկանիշը Ամուլսարի պատճառով ընկել է:
-Մամուլի յուրաքանչյուր հրապարակում, առաջին հերթին անհրաժեշտ է վերլուծել՝ ելնելով լրատվամիջոցի սեփականատերերի քաղաքական շահերի առկայությունից, ֆինանսավորման աղբյուրների բնույթից, ինչպես նաեւ տվյալ լրատվամիջոցում տեղ գտնող լուրերի պատմական արժանահավատության վարկանիշից։ Ծանոթ չեմ որեւէ արժանահավատ հետազոտության, որտեղ արձանագրվել է նշված միտումը: Հետեւաբար, նման հրապարակումները անհիմն են եւ կրում են մանիպուլատիվ բնույթ։
– ԱԳՆ կենտրոնական ապարատի եւ օտարերկրյա պետություններում ՀՀ դիվանագիտական ծառայության մարմինների ղեկավարների ամենամյա համաժողովում վարչապետ Նիկոլ Փաշինյանի ելույթին արձագանքելով՝ Արմեն Աշոտյանը խորը հիասթափություն արտահայտեց ու հարցրեց՝ ինչի՞ց է դառնացած Նիկոլ Փաշինյանը, օրինակ, որ ստացել է ՀՀ նորագույն պատմության մեջ արցախյան հակամարտության ծագման օրվանից մինչ այսօր ամենահաջողված, ամենալավ բանակցված փաթե՞թը: Ինչպե՞ս կարձագանքեք այդ հայտարարությանը:
-Շարունակ զարմանում եմ, որ ներքին եւ արտաքին քաղաքականության մեջ ֆիասկո արձանագրած ուժի ներկայացուցիչը շարունակում է արտահայտել տեսակետներ, որոնք վկայում են իր կուսակցության կատարած սխալների վերաբերյալ ռեֆլեքսիայի իսպառ բացակայության մասին:
Տաթեւ ՀԱՐՈՒԹՅՈՒՆՅԱՆ
«Առավոտ» օրաթերթ
30.08.2019
