«Ես հռչակված առաջնահերթությունների հետ կապված խնդիր եմ տեսնում, օրինակ, ինքնիշխանության հետ կապված, որովհետեւ եթե մեկը ինձ Եվրոպայի խորհրդում հարց տա՝ ի՞նչ էր եղել ձեր ինքնիշխանությանը, որ դուք այն հռչակել եք՝ որպես առաջնահերթություն, ճիշտն ասած, ես չեմ կարող այդ հարցին պատասխանել: Քանի որ հռչակել եք, ասեք, իմանանք, թե ինչ ենք ասելու»,- այսօր ԱԺ-ում ԱԳՆ կենտրոնական ապարատի եւ դիվանագիտական ներկայացուցչությունների ղեկավարների հանդիպման ընթացքում ասաց «Լուսավոր Հայաստան» խմբակցության ղեկավար Էդմոն Մարուքյանը: Հիշեցնենք, որ ՀՀ դիվանագիտական ծառայության մարմինների ղեկավարների ամենամյա համաժողովին արտաքային քաղաքականության առաջնահերթություններ ու սկզբունքներ էին հռչակվել՝ ինքնիշխանություն, համահայկականություն, փոխգործակցություն:
Մարուքյանն ասաց, որ երբ ասում են՝ մենք ժողովրդավարական երկիր ենք, դրսում հարց են տալիս՝ ի՞նչ ժողովրդավարական բարեփոխումներ եք արել մեկուկես տարվա մեջ: Այս պահին դրա հետ կապված ոչ մի բան չկա, միայն կարող են պատմել, թե ոնց եղավ հեղափոխությունը. «Դատական ռեֆորմն ի՞նչ եղավ, մյուս ռեֆորմներն ի՞նչ եղան: Ժողովրդավարությունը ստանդարտներ են, չափորոշիչներ են, դա էմոցիա չի, վերջին հաշվով այդ ստանդարտով են մեզ չափելու»:
Մարուքյանը, դիմելով դեսպաններին, ասաց, որ նրանք հեղափոխությունից հետո չեն փոխվել, միայն վերադասավորումներ են եղել. «Ի՞նչ ունեինք մինչեւ հիմա՝ շատ լավ ձեռքբերումներ՝ ՀԱՊԿ անդամ միակ երկիրն ենք, որ ՆԱՏՕ-ի հետ ունենք այդքան խորը համագործակցություն: Լինելով ԵԱՏՄ միակ անդամ երկիրը, որը ԵՄ-ի հետ ունի ստորագրված համաձայնագիր, որն ընթացքի մեջ է եւ շատ լավ է: Դա հեղափոխությունից առաջ էր, անցել է մեկուկես տարի, ի՞նչ ենք մենք ավելացրել այդ եղածի վրա: Ձեր շնորհիվ մենք ունեինք այդ բացառիկ ձեռքբերումները եւ մեկուկես տարվա մեջ, որպես պրոդուկտ դրսում վաճառելու, մենք ունենք նաեւ ժողովրդավարությունը, խոսքի ազատությունը, այն արժեքները, որոնք հռչակվել են հեղափոխությամբ: Դա գալիս է գումարվելու մեր ունեցածին, բայց ես այսօր արդյունքով դա չեմ կարող ասել: Մեկուկես տարի անցել է, ես ուզում եմ հասկանալ՝ մենք այս մեծ ձեռքբերումն ինչպե՞ս ենք կարողացել «վաճառել» դրսում»:
Խոսելով խորհրդարանական նախկին ու ներկա դիվանագիտության մասին՝ Մարուքյանն ասաց. «Ինչպիսի՞ խորհրդարանական դիվանագիտություն է ունեցել Հայաստանը: Որ ասեմ՝ շատ հզոր, շատ լավն է եղել, անկեղծ չեմ լինի, մենք ունենք ռեակտիվ պրոցեսներ, այսինքն, ՀԱՊԿ-ի ֆորմատում, ԵԽԽՎ-ի, ԵԱՀԿ-ի, ՆԱՏՕ-ի, բոլոր ֆորմատներում ակտիվ սպասում ենք, որ եթե հանկարծ մեր դեմ ինչ-որ նախաձեռնություն լինի, մենք լծվենք գործի, էդ նախաձեռնության դեմ պայքարենք, հերոսաբար մի բան անենք, որ էդ բանաձեւը չընդունվի ընդդեմ ՀՀ-ի եւ Արցախի շահերի: Բայց ես կարծում եմ, որ մենք պետք է պրոակտիվ խորհրդարանական դիվանագիտության մեջ լինենք, իսկ դա նշանակում է ներգրավվել համաԱՊՀ-ական համաեվրոպական, համաեվրասիական, համաՆԱՏՕ-ական բոլոր թեմաների մեջ եւ մեր խոսքն ասել այնտեղ: Կապ չունի, որ Արցախի հարց այնտեղ կարող է չլինել, կապ չունի, մենք պետք է այդտեղ երեւանք, մեր խոսքն ասենք, այդտեղ ընկերներ, գործընկերներ, համախոհներ ձեռք բերենք, որ եթե հանկարծ մի օր մեկը մեր դեմ ինչ-որ բան ուզենա ասի, մենք ծանոթ ման չգանք, մենք ընկերներ ունենանք, որոնք ասեն՝ մի րոպե հլը»:
Կարդացեք նաև
Ըստ Մարուքյանի, այսօր խորհրդարանի պատգամավորների կարողությունները թե՛ լեզուների իմացության, թե՛ կրթության, թույլ են տալիս, որ մենք կարողանանք ունենալ պրոակտիվ խորհրդարանական դիվանագիտություն: Դա այլընտրանք չունի»: Նա ասաց, որ մեր պատգամավորները պետք է ներգրավվեն բոլոր հնարավոր տեղերում եւ Հայաստանի դրոշը պետք է ծածանվի, երեւա:
Հռիփսիմե ՋԵԲԵՋՅԱՆ
