Նոր սերնդի ՀԴՄ-ներ չունեցող տնտեսվարողներն, ամենայն հավանականությամբ այլեւս չեն տուգանվի, մինչեւ ՀՀ ներմուծվեն նոր սերնդի հաշվիչ դրամարկղային մեքենաները:
Քիչ առաջ ավարտվել է ՊԵԿ նախագահ Դավիթ Անանյանի եւ «Կասեցում» քաղաքացիական շարժման ներկայացուցիչներ Սամսոն Գրիգորյանի, Տիգրան Քեյանի եւ ԱԺ պատգամավոր Սիսակ Գաբրիելյանի հանդիպում-քննարկումը, որը վերաբերում էր օրերս մեծ աղմուկ հանած խնդրին՝ տնտեսվարողներին տուգանում են նոր սերնդի ՀԴՄ չունենալու, բայց գործունեություն ծավալելու համար: Մինչդեռ խնդիրն առաջացել է ՊԵԿ-ի պատճառով. Այս տարվա հունվարի 1-ից նոր սերնդի ՀԴՄ-ները պարտադիր են բոլոր այն տնտեսվարողների համար, որոնք աշխատում են ՀԴՄ-ներով: Կառավարությունը ՀԴՄ ներմուծման դաշտն ազատականացրեց, սակայն, առայժմ նոր սերնդի ՀԴՄ ներմուծող տնտեսվարող չկա, գործարարները չեն կարողանում դրանք ձեռք բերել:
Aravot.am-ի հետ զրույցում Սամսոն Գրիգորյանն ասաց, որ գոհ է ՊԵԿ նախագահի հետ քննարկումից. «Ինչպես հասկացա՝ առավոտյան վարչապետն էլ ՊԵԿ նախագահի հետ խորհրդակցություն է ունեցել: Ինչ վերաբերում է տուգանումներին, ապա մեզ բացատրեցին, որ ՊԵԿ-ն իր գործառույթը պարտավոր է իրականացնել, իրավունք չունի չկատարել, այսինքն՝ պետք է վերահսկի, տուգանի, բայց ամեն ինչ կանեն, որպեսզի տուգանումները վերջին պլանում լինեն: Ուղղակի մշտադիտարկում են անելու, բայց մինչեւ նոր սերնդի ՀԴՄ-ների ներմուծումը՝ տուգանումներ չեն լինի»:
Գրիգորյանն ասաց, որ ՊԵԿ նախագահը վստահեցրել է՝ այն տնտեսվարողները, որոնք արդեն տուգանվել են, կարող են դիմել են ՊԵԿ բեկանման հանձնաժողով.«Ամենայն հավանականությամբ՝ նրանց գործերը կբեկանվեն»:
Կարդացեք նաև
Սամսոն Գրիգորյանի փոխանցմամբ՝ Դավիթ Անանյանը վստահեցրել է՝ նոր սերնդի ՀԴՄ-ներ չունեցող տնտեսվարողների նկատմամբ ՊԵԿ-ն ավելի մեղմ վերաբերմունք է ցուցաբերելու»:
Aravot.am-ի հարցին՝ արդյոք բյուրոկրատական քաշքշուկներ չեն առաջանում՝ տուգանվեն, հետո գնան բեկանման հանձնաժողով, քննարկեն, պարզ չի՝ ինչ կորոշեն, պրն Գրիգորյանը պատասխանեց. «Չեն տուգանվի, չեն տուգանվի»:
Սամսոն Գրիգորյանը տնտեսվարողներին հորդորում է՝ հայտարարագրել եկամուտները եւ վճարել հարկերը, իսկ նոր բացվող բիզնեսները պետք է անպայման նոր սերնդի ՀԴՄ սարք ստանալու հայտ ներկայացնեն։
Նելլի ԲԱԲԱՅԱՆ
