Այսօր լրատվամիջոցների հետ հանդիպման ժամանակ հրաժարական տալու մասին հայտարարած հունահռոմեական ոճի ըմբշամարտի ազգային հավաքականի գլխավոր մարզիչ Լեւոն Ջուլֆալակյանին Aravot.am-ը հարցրեց, թե հավաքականի մարզչական շտաբը նրա այս որոշման հետ կապված որեւէ դիրքորոշում հայտնե՞լ է, եւ արդյոք ճի՞շտ է աշխարհի առաջնության շեմին եւ օլիմպիական խաղերի մեկնարկից ընդամենը մեկ տարի առաջ հրաժարական տալը:
«Այս որոշումը կայացրել եմ մեկ ամիս առաջ, սակայն որոշ հանգամանքների բերումով ավելի վաղ հայտարարություն անել չստացվեց: Մարզչական կազմը փորձել է համոզել, թե ճիշտ չի լինի: Բայց ես նրանց հարցրել եմ, թե իրենք նման պարագայում կկարողանայի՞ն մի կողմ դնել իրենց ինքնասիրությունը: Ամեն մարդ ունի իր մոտեցումը: Ես չեմ կարող: Ինչ մնում է աշխարհի առաջնությանը, այո, աշխարհի առաջնությունը մոտ է, բայց չեմ կարող նման երեւույթների պարագայում աշխատել այն կազմի հետ, որը ներքին խոհանոցում նման քայլեր է անում», – պատասխանեց մասնագետը եւ հավելեց, որ ընդհանրապես մարզչական գործունեությունից չի հրաժարվում եւ շարունակելու է որպես անձնական մարզիչ աշխատել իր որդու՝ Արսեն Ջուլֆալակյանի հետ:
Աշոտ ՀԱԿՈԲՅԱՆ
