«Իմ քայլը» խմբակցության պատգամավորներից ոմանք մտահոգություն են հայտնել ու գտնում են, որ Ամուլսարի հանքի շահագործումն անդառնալի հետեւանքներ կունենա: Հարցին, թե ձեր տեսակետ ինչպիսի՞ն է՝ ԱԺ նախագահ Արարատ Միրզոյանը պատասխանեց, որ խմբակցությունում, կառավարությունում հարցը քննարկվում է եւ հիմա այն փուլում է, որ վարչապետը շրջակա միջավայրի նախարարությանը հարցրել է՝ արդյոք «Էլարդի» փորձաքննությունը հիմք է տալիս գալու եզրակացության, թե կարիք կա նոր ՇՄԱԳ-ի: Նա ասաց, որ իր տեսակետն ունի, բայց հիմա չի հայտնի:
Հարցին՝ կարո՞ղ է արդարացված լինել հանքի շահագործումը, որովհետեւ տեսակետ կա, թե նախկին իշխանության գիծն է տարվում՝ Արարատ Միրզոյանը պատասխանեց. «Ընդհանրապես որեւէ հանքի շահագործում, իհարկե, կարող է արդարացված լինել: Որեւէ մեկը կարող է պնդել, որ հիմա մենք Հայաստանի բոլոր հանքերը պետք է փակե՞նք: Կոնկրետ այս դեպքում եկեք սպասենք շրջակա միջավայրի նախարարության պատասխանին: Հիանալի է որ այդ դիսկուրսը հայ հանրության մեջ կա, բոլոր կարեւոր հարցերում լավ կլինի, որ կարծիքների բախումը լինի, իհարկե, գնահատականների քաղաքակիրթ լինել-չլինելու մասին կարող ենք խոսել: Հայհոյանքներին զուգահեռ բավականին փաստարկված կարծիքներ ենք լսում, որոնք պետք է քննվեն»:
Հարցին՝ ունե՞ք մտահոգություններ՝ նա պատասխանեց. «Ո՞նց կարող է ողջախոհ մարդը չունենա մտահոգություն, ուրիշ բան, որ այդ մտահոգությունները կարող են փարատվել, չփարատվել, հիմնականում փարատվել, հիմնականում չփարատվել: ՀՀ որեւէ քաղաքացի ո՞նց կարող է անտարբեր լինի որեւէ հանքի գործունեությամբ պայմանավորված թափոններով: Որեւէ մեկը հո այս երկրի թշնամի՞ն չի, հո երկրին կողքից չի՞ դիտում, բոլորս էլ սիրում ենք մեր հայրենիքը: Ուրիշ բան, որ պետք է նայենք, տեսնենք՝ ինչպես պնդվում է՝ ռիսկերը կառավարելի՞ են, թե՞ չէ, նոր ՇՄԱԳ-ի անհրաժեշտության կարիք կա՞, թե՞ չէ: Ինչ-որ մարդիկ ասում են, որ էդ ՇՄԱԳ-ը որոշակի պարբերականություն ունի, եթե հանքը չի գործում…էլի գործ ունենք փաստարկների եւ հակափաստարկների հետ: Դրա համար եկեք սպասենք մասնագիտացված կառույցն իր խոսքն ասի, մնացածը սառը գլխով կորոշենք»:
Հարցին իշխանության վարկանիշի առումով մտահոգություն չե՞ք տեսնում, որ եթե հանքը շահագործվի, մի շարք անձինք, ովքեր քվե են տվել, հիմա ասում են, որ ափսոսում են, եթե հանքը պիտի շահագործեն՝ Արարատ Միրզոյանը պատասխանեց. «Ես համաձայն եմ այն պնդման հետ, որ դրանից կարող է իշխանության վարկանիշը որոշակի անկում ապրել, թեեւ այն խմբերը, որոնք քարոզում են հանքի չշահագործումը՝ «Ամուլսարը սար է մնալու, հանքը չի շահագործվելու» սկզբունքից ելնելով, այստեղ չեմ կարծում, թե էդ ակտիվ մարդկանց մեծ մասն, այնուամենայնիվ, «Իմ քայլին» է ձայն տվել, բայց կարեւոր չի, թե ով է ձայն տվել, ով չի տվել, մենք բոլորին ենք ներկայացնում: Եթե Ամուլսարի դեպքում գանք շահագործման, որեւէ այլ հարցում, կարծում եմ, իհարկե, կարող են լինել այնպիսի որոշումներ, որ իշխող ուժի վարկանիշը կարող է անկում ապրել, այստեղ ուրիշ փիլիսոփայական հարց կա՝ արդյոք որեւէ իշխանություն պիտի մտածի, որոշումները կայացնի՝ ելնելով միմիայն վարկանիշից, թե՞ կարող են լինել այնպիսի իրավիճակներ, երբ որեւէ որոշում պոպուլյար չլինի հանրության շրջանում, բայց երկրի շահերը ենթադրեն այդպիսի որոշման կայացում: Այստեղ պիտի պատասխանատվությունից խոսենք»:
Կարդացեք նաև
ԱԺ նախագահը չի գտնում, որ իրենց խմբակցությունում, եթե Ամուլսարի հարցում տարբեր կարծիքներ են հնչել, ուրեմն պառակտում կա, դրա անունը, ըստ նրա, բազմակարծություն է, բայց ոչ պառակտում:
Հռիփսիմե ՋԵԲԵՋՅԱՆ
