«Ամուլսարն առանց հանքի» նախաձեռնությունը Ազատության հրապարակում հավաքված մարդկանց տեղեկացրեց, որ այսօրվա քայլերթով աջակցություն են հայտնում ջերմուկցիներին, միեւնույն ժամանակ ցանկանում են օգնել կառավարությանը՝ «Լիդիանի» գործունեությունը դադարեցնելու հարցում ճիշտ լուծումներ գտնել:
Նախաձեռնության անդամ, ծրագրավորող Տիգրան Մարտիրոսյանը նաեւ հայտարարեց, որ Հայաստանի Հանրապետության Հռչակագրի 7-րդ կետում նշված է, որ Հայաստանի հողը, ջուրը, ընդերքը ժողովրդի սեփականությունն է: «Այստեղից բխում է, որ հողի, ջրի, ընդերքի վերաբերյալ որոշումները պետք է կայացվեն ուղիղ ժողովրդավարական միջոցներով՝ Հայաստանի ժողովրդի ձայնը հաշվի առնելով: Բայց Լեւոն Տեր-Պետրոսյանի իշխանության օրոք ընդունված սահմանադրությունում նշված է, որ ընդերքը, ջուրը, հողը պետության սեփականությունն է:
Մի կողմից պետությունն էլի ժողովուրդն է, սակայն այս դեպքում որոշում կայացնելու որոշումը տրվում է պաշտոնյաներին: Այստեղից էլ կարելի է եզրահանգում անել, որ ժողովրդի սեփականության նկատմամբ որոշում կայացնելու իրավունքը բռնազավթվել է: Թեեւ կարող են հակադարձել, թե ժողովուրդն ընտրում է ղեկավարություն եւ որոշելու իրավունքը փոխանցում է ղեկավարությանը, սակայն ամեն դեպքում, ժողովուրդը պատանդ չէ իր ընտրած կամ չընտրած՝ ղեկավարության ձեռքում եւ, կարծում եմ, ընդերքի ռեսուրսների հետ կապված ժողովրդի ձայնը պետք է լինի ոչ թե ղեկավարների միջոցով, այլ ուղղակի ժողովրդավարական մեխանիզմներով, ասենք՝ հանրաքվեով»,-ասաց նա:
Կարդացեք նաև
Աշոտ ՀԱԿՈԲՅԱՆ
