«Իրենք ուղղակի խայտառակվեցին, ու հասկացան, որ իրենց հանձնարարությունը չեն կատարել, քանի որ ապաշնորհ են: Եթե էլի ինչ-որ տեղ հանդիպենք, ու կապը, ինչ-որ կառույցների անդամությունը կամ մասնակցությունը ապացուցենք, գուցե ընթացք տանք: Բայց եթե մանր-մունր բաների վրա մեր ռեսուրսներն ուղղենք, մեկ կյանքը չի հերիքի»,- Aravot.am-ի հարցին՝ ի՞նչ ընթացք են տալու Սարյան պուրակում տեղի ունեցած միջադեպին մասնակցած անձանց պատասխանատվության ենթարկելու հարցով, այսպես պատասխանեց «Հելսինկյան ասոցիացիա» իրավապաշտպան հասարակական կազմակերպության ղեկավար Նինա Կարապետյանցը:
Հիշեցնենք՝ օգոստոսի 21-ին, երբ Սարյան պուրակում «Ամուլսարի շահագործման թեմայով» հանրային քննարկման ժամանակ ելույթ էր ունենում Հայկական բնապահպանական ճակատի անդամ Լևոն Գալստյանը, նրա կողքով անցան երկու տղամարդիկ և ասացին. «Սերժի ժամանակ ինչո՞ւ չէիք խոսում»: Այս միջադեպից հետո «Հելսինկյան ասոցիացիա» իրավապաշտպան հասարակական կազմակերպության ղեկավար Նինա Կարապետյանցը հայտարարեց. «Երկու պարոնայք մեզ միացել ու գաղտնի նկարահանում էին: Վերադարձեք, դիմացից նկարեք, այդպես լավ է ստացվում: Ոչ մեկ չի վախենում ձեր նկարելուց: Եկել օպերատիվ տեղեկություններ եք փնթի հավաքում: Ձեր նկարները կան ու կհրապարակվեն: Սա էլ հենց իրենց սադրիչն էր»:
Նինա Կարապետյանցի կարծիքով՝ այդ միջադեպում երկու տարբերակ կա: Նա մանրամասնեց. «Մի տարբերակն այն է, որ դա պետական մարմիններն էին և իրենք իրենց օպերատիվ հետախուզական միջոցառումներն էին իրականացնում: Երկրորդը, որ որոշ շահագրգիռ ուժեր էին, որոնք հետաքրքրված էին բնապահպաններով և նրանց միացած մարդկանց՝ ով, ինչ լինելով. կոնկրետ անձերը ճշտելու հետ կապված: Նկարներ ու տեսանյութեր իրականում կան: Նման տիպի անձինք անմիջապես տարբերվում են: Դրա համար մեր աչքից չեն վրիպել. ես և Արման Վեզիրյանը նկարահանել ենք»:
Մեր հարցին՝ նոր Հայաստանում հին ավանդույթները շարունակվո՞ւմ են, Նինա Կարապետյանցը պատասխանեց. «Բոլորովին չեմ բացառում, որ կարող է ինչ-որ մասնավոր շահագրգիռ կողմ հետաքրքրված լինի ու իրենց նախաձեռնությունը լինի: Ամուլսարի հետ կապված հետաքրքրությունը, շահագրգռվածությունը բավականին մեծ է, ու ներգրավված են բավականին մեծ ուժեր, հետաքրքրություն ունեցող կառույցներ, մարդիկ: Հետևաբար չեմ բացառում, որ դա կարող էր ոչ պետությունը լինել: Հիմա հստակ չգիտեմ, թե ում կողմից էին ուղարկված: Իսկ նախկինում մենք հաստատ վստահ էինք, որ ցույցերի ժամանակ դրանք ԱԱԾ ներկայացուցիչներն էին, որ գալիս էին տեղեկություններ հավաքելու, ճնշումներ գործադրելու: Դա ապացուցվում էր նրանով, որ գյուղերից ցույցերի եկած մարդկանց այցելում էին գյուղապետերը, կամ նրանց էին հրավիրում ոստիկանություն: Ինչ-որ բացատրական աշխատանքներ էին տանում: Ակնհայտ էր, որ պետական համակարգն է աշխատում: Բայց այս դեպքում բոլորովին չեմ բացառում մասնավորի մասնակցությունը»:
Կարդացեք նաև
Տաթև ՀԱՐՈՒԹՅՈՒՆՅԱՆ
