«Ոստիկաններն ուժ չէին կիրառի՝ առանց վերեւի հրամանի, իրենք ինքնագլուխ չեն գործել»,-Aravot.am-ի հետ զրույցում այսպիսի կարծիք հայտնեց Ամուլսարի հանքի շահագործման դեմ պայքարող Անի Խաչատրյանը: Նա երեկ բողոքի ցույցի ժամանակ բերման է ենթարկվել ոստիկանության բաժին:
Արդեն հայտարարություններ են հնչում, որ երեկ ոստիկանական գործողություններն իրավաչափ չէին:
Անի Խաչատրյանը պնդեց. «Եթե եղել է ամենավերեւից հրաման ուժ կիրառելու՝ մենք անցնում ենք հին մեթոդներին, հին ռեժիմի մեթոդներին՝ ուժ կիրառելով ցրել խաղաղ հավաքները, ոչ թե ցույցերը: Դա հավաք էր, որովհետեւ մենք ուղղակի որոշել էինք քննարկում անել: Իսկ եթե ոստիկաններն ինքնագլուխ են գործել, ուրեմն համապատասխան մարմինները պետք է զբաղվեն համապատասխան ոստիկաններով»:
Ոստիկանության հայտարարության համաձայն. «Այո, հավաքը խաղաղ էր, եւ ոստիկանությունը, իրականացնելով իր գործառույթները, պահպանում էր հասարակական կարգը, ապահովում հավաքի մասնակիցների անվտանգությունը: Հետո, սակայն, քաղաքացիները փակեցին Բաղրամյան պողոտան: Ոստիկանությունը մի քանի անգամ հայտարարեց, որ նրանց գործողությունները չեն բխում օրենքից, եւ բավարար ժամանակ տվեց՝ պողոտան բացելու համար: Սակայն նրանք հրաժարվեցին կատարել ոստիկանների օրինական պահանջը, եւ ոստիկանությունը ստիպված էր միջամտել: Փողոցը փակած քաղաքացիները մի քանի անգամ հեռացվեցին պողոտայից մայթ, սակայն կրկին վերադարձան ու փակեցին ճանապարհը: Եվ ստիպված ուժ կիրառվեց, ոչ թե բռնի, այլ համաչափ ֆիզիկական ուժ՝ պողոտան բացելու համար»: Ապա՝ ոստիկանությունն իր այսօրվա հայտարարությունն ամփոփել է մի երկիմաստ արտահայտությամբ.«Բոլորս նույն կողմում ենք»:
Կարդացեք նաև
Անի Խաչատրյանը, սակայն, նշեց. «Եթե ոստիկանները դեմ են Ամուլսարի շահագործմանը՝ ուրեմն այո, նույն կողմում ենք, բայց նրանք ուժային, հրաման կատարող կառույց են, իրենց ինչ հրաման տալիս են՝ անում են: Բայց ոստիկանություն տանելիս ինձ հետ շատ կոպիտ են վարվել նրանք, թեւերիս վրա մինչեւ հիմա կապտուկներ են, ինձ անգամ ձեռք են գցել»:
Ինչ վերաբերում է ոստիկանության այն հիմնավորումներին, թե քաղաքացիները փողոց են փակել, ու համաչափ ուժ է կիրառվել քաղաքացիների նկատմամբ, Խաչատրյանը հիշեցրեց հեղափոխության օրերի գործողությունները, երբ մարդիկ փողոց էին փակում, որպես բողոքի ցույց. «Կարծեմ այդ փողոց փակելու շնորհիվ է հիմա Օսիպյանը ոստիկանապետ, Նիկոլ Փաշինյանն էլ՝ վարչապետ, ու այն մարդկանց շնորհիվ, ովքեր երեկ փողոց էին փակել, ու փողոց էին փակել նաեւ հեղափոխության օրերին: Իսկ եթե նշում են, թե խաթարվել է երթեւեկությունը, քաղաքացիներ իրավունքներն են խախտվել, դե եթե այդ ամենը իրավաչափ է, ուրեմն՝ թող Նիկոլ Փաշինյանին ենթարկեն պատասխանատվության՝ փողոց փակելու համար»:
Նելլի ԲԱԲԱՅԱՆ
