ԱԺ նախկին պատգամավոր Սեյրան Սարոյանը նախկինում լրագրողներին վստահեցնում էր, որ ոչ մի կերպ չի պատկերացնում՝ Աշոտյանը ո՞նց կարող է ընդդիմություն լինել, Աշոտյանից ի՞նչ ընդդիմություն: Այսօր հրավիրած ասուլիսում լրագրողները գեներալին հարցրեցին՝ հիմա Աշոտյանը վա՞տ ընդդիմություն է: Նա պատասխանեց. «Տեղերը փոխվել են: Էն վախտ Նիկոլն էր քլնգում, հիմա Աշոտյանն է քլնգում: Վատ չի քլնգում, քեզ ասեմ, շատ էլ լավ խոսում է: Ինչքան բաց տեղ տենան՝ պիտի խոսան»:
Սարոյանը «նոր Հայաստանում» անելիքներ է տեսնում. «Պիտի մթնոլորտը փոխենք, դարձնենք թավշյա… Խոսում են՝ Պիպոն ու Սեյրանը իրար հետ լավ չեն, Պիպոն ու Տիկոն իրար հետ լավ չեն: Կեղտոտ խոսակցություն, չեն էլ իմանում՝ ինչ բարեկամական կապեր ունեն իրար հետ: Պիպոյի ամենամոտ ընկերները, որ առավոտից իրիկուն իրար հետ են, 4-5 հոգի են, էն էլ իմ տղա Աշոտի բաջանաղներն են: Կամ սաղ իրար քավոր-սանիկ են կամ բարեկամ»:
Անդրադառնալով Սերժ Սարգսյանի հնարավոր ձերբակալման մասին լուրին՝ Սեյրան Սարոյանն ասաց, որ չի հավատում. «Հենա մեկին բռնել ենք, ի՞նչ հասցրինք, որ երկրորդին էլ բռնենք: Սուտի շուխուռ է»: Հարցին՝ եթե, այնուամենայնիվ, ձերբակալեն, ի՞նչ կանեք, բողոքի ցույցեր կանե՞ք հանուն Սերժ Սարգսյանի, որովհետեւ առաջ ասում էիք՝ պիտի Աստծուն խնդրենք, որ հանկարծ Սերժ Սարգսյանը «չփոշմանի» ու անպայման առաջադրվի վարչապետ: Սարոյանը պատասխանեց, որ հիմա էլ է ասում, բայց բողոքի ցույց անել չի պատրաստվում. «Ես փողոց հելնո՞ղ եմ արա քո համար, ես կյանքում չեմ հելնի»:
Հարցին՝ փաստորեն, համ Սերժ Սարգսյանն անփոխարինելի է, համ էլ Նիկոլ Փաշինյանից գո՞հ եք՝ պարոն Սարոյանը պատասխանեց. «Ես վերջին հարցազրույցում ասի՝ կուզենամ, որ Նիկոլ Փաշինյանը Սերժ Սարգսյանի նման արտաքին քաղաքականություն կարա տանի: Էսօր էլ եմ ասում: Եթե Նիկոլ Փաշինյանը Սերժ Սարգսյանի նման կարողանա արտաքին քաղաքականություն տանի, մենք շատ լավ ենք լինելու»:
Կարդացեք նաև
Նա ասաց, որ այս քանի օրը պիտի հանդիպի Փաշինյանի հետ, նրա հետ նորմալ, ընկերական հարաբերություններ ունի:
Հռիփսիմե ՋԵԲԵՋՅԱՆ
