Ավելի քան 100 մարդ բացասական գրառում են թողել Մոսկվայի «Արմենիա» ռեստորանի հասցեին՝ ռեստորանի սեփականատիրոջ կողմից Մոսկվայի քաղաքային դումայի ընտրություններում չգրանցված ընդդիմադիր թեկնածուների դեմ ներկայացրած հայցից հետո: «Անկոր» ընկերությունը պահանջում է 551 հազար ռուբլի ընդդիմադիր քաղաքական գործիչներից՝ պնդելով, որ ցույցերի օրը ստիպված է եղել փակել ռեստորանը:
Բացասական գնահատականների մեծ մասը թողնվել է ռեստորանի ֆեյսբուքյան էջում, ինչպես նաև TripAdvisor հավելվածում: Հիմնականում դրանցում բողոքում են սպասարկումից:
Մասնավորապես, պնդում են, որ հաստատությունում սնունդը վատն է, աղմկոտ է, կեղտոտ, ճաշացանկն աղքատիկ է, ինչպես նաև անձնակազմն անհարգալից է և տգետ: Որոշ մեկնաբանություններում ռեստորանին ուղղակիորեն քննադատում են ընդդիմադիր քաղաքական գործիչների դեմ ներկայացրած հայցի համար: Facebook-ի մի շարք օգտատերեր կոչ են անում բոյկոտել ռեստորանը, իսկ մյուսները կարծիք են հայտնում, որ այդ հաստատությունը պետք է սպասարկի Ռոսգվարդիային:
Բացասական մեկնաբանություն թողնողներից մեկը գրել է, որ նախկինում հաճախ էր գալիս «Արմենիա», բայց այսուհետ «ոտք չի դնի»:
Կարդացեք նաև
Այս պահին Facebook-ում ռեստորանի վարկանիշը 5 բալանոց սանդղակում ունի 2 միավոր:
«Արմենիա» ռեստորանից առայժմ չեն մեկնաբանել բացասական գնահատականների հոսքի հետ կապված այդ իրավիճակը:
Պատրաստեց՝ Վիկտորյա ԱՆԴՐԵԱՍՅԱՆԸ
