ՀՀ ԱԺ «Իմ քայլը» խմբակցության պատգամավոր Արփինե Դավոյանը չի կարծում, թե այս պահին արժե ենթադրություններ անել եւ մտածել, թե աշնանն ինչ պիտի լինի, ով պետք է կոնսոլիդացվի, ինչ ուժեր պետք է միավորվեն:
Առաջիկայում սպասվող թեժ աշնան, իշխող ուժին հակակշիռ բեւեռի ձեւավորման նախադրյալների մասին «Առավոտը» զրուցեց «Իմ քայլը» խմբակցության պատգամավոր Արփինե Դավոյանի հետ:
-Դուք իշխող քաղաքական ուժին հակակշիռ բեւեռի ձեւավորման նախադրյալներ տեսնո՞ւմ եք, քանի որ անընդհատ միավորման, սպասվող թեժ աշնան մասին հայտարարություններ են հնչում:
-Իրականում այս պահին չեմ կարծում, որ արժե ենթադրություններ անել եւ մտածել, թե աշնանն ինչ պիտի լինի, ով պետք է կոնսոլիդացվի, ինչ ուժեր պետք է միավորվեն: Երբ ասվում է, թե թեժ աշուն է սպասվում, մենք դա տեսնում, լսում ենք մի խումբ մարդկանցից, որոնք հանրության մեջ վստահություն չեն վայելում, որոնք նախկին իշխանության ներկայացուցիչներն են, նախկին իշխանության ներկայացուցիչների ներկայացուցիչները, ֆեյքեր, անդեմ եւ ծախված մարդիկ: Այսինքն՝ հիմնականում այնպիսի մարդիկ, որոնք ինչ-որ բան են կորցրել 2018-ի հեղափոխության արդյունքում եւ հիմա ամեն ինչ անում եւ փորձում են վերականգնելու համար այն, ինչ կորցրել են, իսկ արդյոք նրանք ունե՞ն քաղաքական օրակարգ, որի նպատակն է ծառայել ՀՀ-ին, թե՞ ոչ՝ մնում է անհայտ: Հիմնականում նմանատիպ մարդիկ են խոսում կամ հայտարարություններ անում եւ նրանց ուղղվածությունը նույնն է՝ վատաբանել ՀՀ ներկայիս իշխանություններին, ամեն ձեւով մարդկանց մանիպուլացնել՝ բացասական երեւույթներ գտնել եւ կենտրոնանալ դրանց վրա: Եվ այդ մարդիկ հիմնականում օգտագործում են իրենց ունեցած ֆինանսական եւ մեդիա հնարավորությունները, լրատվական դաշտը դարձնելով բամբասանքի եւ ենթադրությունների աղբյուր՝ անընդհատ նույն բանը կրկնելով, որ ամեն ինչ վատ է, կործանվեցինք՝ հասեք, փրկեք:
Կարդացեք նաև
Իրականում այդ մարդիկ հետապնդում են կոնկրետ շահ. չեն ուզում ՀՀ-ում լինի ժողովրդավարություն եւ քաղաքացին իրեն զգա որպես իրավատեր քաղաքացի, քանի որ տվյալ դեպքում իրենք չեն կարող այնպես պահել իրենց, ինչպիսին իրականում կան, այդ իսկ պատճառով դժգոհությունը միայն այն հատվածի կողմից է, որոնք կորցրել են իրենց ամեն ինչը: Հաճախ տեսնում ենք տարբեր տեսակի դժգոհություններ հարուցված քրեական գործերի վերաբերյալ, ասում են, թե քաղաքական հետապնդումներ են կատարվում, որն իրականության հետ որեւէ աղերս չունի: Եթե մարդը քրեական գործով է անցնում, մեղադրել իշխանություններին, թե դա քաղաքական հետապնդում է, ուղղակի ծիծաղելի է: Նման բան չի կարող լինել ներկայում, ես բացառում եմ որեւէ տեսակի քաղաքական հետապնդում որեւէ մեկի նկատմամբ: Քաղաքական հետապնդում համարում են նրանք, որոնք անցած իշխանության կարկառուն ներկայացուցիչներ են, որոնք լավ էլ տեղյակ են ինչի՞ կամ ու՞մ մասին է խոսքը, որովհետեւ, մեծ մասամբ, գործերը հարուցվում են այնպիսի անձանց նկատմամբ, ովքեր չարաշահելով իրենց դիրքը՝ օգտագործել են այն իրենց անձնական նպատակներով:
-Այսօր մամուլում հրապարկվել է Սուրբ Աթոռում ՀՀ նախկին դեսպան Միքայել Մինասյանի հոդվածը, որտեղ նա նշում է, որ Հայաստանում հեղափոխությունը դեռ անխուսափելի է, քանի որ թեեւ ապրիլի 23-ից հետո իշխանությունն ուներ «երազանքի թիմ» ձեւավորելու եւ աներեւակայելի արդյունքների հասնելու հնարավորություն, սակայն ընտրվեց այլ ճամապարհ. գնացին քաղաքական հաշվեհարդարների եւ վրեժխնդրության դաշտ: Ի՞նչ կարծիք ունեք հոդվածում հնչեցված մտքերի վերաբերյալ:
-Սա Միքայել Մինասյանի երրորդ նամակն է. որքանով հիշում եմ, մեկն ուղղված էր արեւմուտքին, մյուսը՝ արեւելքին, սա էլ ուղղված է ներքին լսարանին՝ ասելով, որ հեղափոխություն տեղի չի ունեցել եւ շարունակության կարիք կա, ոնց հասկանում եմ հեղափոխության առաջամարտիկն էլ որոշել է ինքը դառնալ: Ես համբերությամբ կսպասեմ Միքայել Մինասյանի մյուս նամակին, որը կվերաբերի, օրինակ, Սերժ Սարգսյանի իշխանության օրոք ՀՀ-ում տեղի ունեցած մտահոգիչ իրադարձություններին, որոնց ժամանակ ոչ մի անգամ ոչ մի նամակ չի գրել: Հուսամ՝ մի օր ականատես կլինենք ինքնախոստովանական նամակին, որում նա այդքան ազնիվ կլինի եւ այդ նամակների փոխարեն կասի, թե ինքն ինչպես է դարձել հանրահայտ Միքայել Մինասյան, ինչպես է դարձել դեսպան Սուրբ Աթոռում, նախկին ռեժիմի ժամանակ բացի դեսպան լինելուց ինչով էր զբաղվում եւ ինչու՞ազատ ժամանակ նամակներ չէր գրում սիրելի իշխանություններին եւ ուղղություն ցույց տալիս:
-Իշխող ուժի ընդդիմախոսներն անընդհատ պնդում են, որ իշխանության վարկանիշն ընկել է հատկապես դատարաններն արգելափակելու գործողություններից հետո: Եթե անկեղծ լինեք՝ Դուք ներսում այդ անհանգստությունն ունե՞ք:
-Մենք մեր վարկանիշի իջնելու կամ բարձր լինելու մասին պետք է իմանանք ոչ թե մեր ընդդիմախոսների խոսքերից, այլ սոցիոլոգիական հարցումներից կամ այնպիսի տվյալներից, որոնք հիմնված են փաստերի վրա: Ցանկացած իշխանության վարկանիշ վայրիվերումների մեջ կարող է լինել: Չեմ ուզում նրանց արձագանքել, չեմ էլ պատրաստվում, երբ իշխանություն էին, երբեւէ չէին մտահոգվել իրենց վարկանիշի մասին, իսկ իրենց վարկանիշը ցածրագույնն է եղել, եւ իրենք հպարտացել են իրենց նկարած վարկանիշներով, հիմա փորձում են ինչ-որ ձեւով մեր վարկանիշի մասին խոսել: Ավելի լավ է թող իրենք իրենց մասին մտահոգվեն:
Տաթեւ ՀԱՐՈՒԹՅՈՒՆՅԱՆ
«Առավոտ»
17.08.2019
