ՀՀ ԱԺ նախագահի տեղակալ Վահե Էնֆիաջյանն օգոստոսի 16-ին հանդիպել է մի խումբ որսորդների հետ: Հյուրերը ներկայացրել են ոլորտում առկա խնդիրները եւ տեղեկացրել, որ գործադիրը նախատեսում է առաջիկայում բարձրացնել սեզոնային որսի արտոնագրի վճարի չափը՝ 8 հազար դրամի փոխարեն սահմանելով 17 հազար դրամ: Որս անել կթույլատրվի միայն շաբաթ եւ կիրակի օրերին: Նշվել է, որ շատ որսորդներ իրենց ապրուստը հոգում են ամենօրյա որսի միջոցով եւ նրանց առջեւ արհեստական խոչընդոտներ են ստեղծվում: Որսորդներն առաջարկել են բարեփոխել օրենսդրական դաշտը: Ըստ նրանց՝ 2007 թվականին ընդունված «Որսի եւ որսորդական տնտեսության վարման մասին» օրենքի որոշ դրույթներ հնարավորություն չեն տալիս պայքարելու որսագողության դեմ:
Հանդիպման մասնակիցները ներկայացրել են մի շարք առաջարկություններ, այդ թվում՝ էլեկտրոնային տարբերակով սեզոնային որսի արտոնագիր ստանալու վերաբերյալ: Նրանք պատրաստակամ են հասարակական հիմունքներով աջակցել կառավարությանը՝ պայքարելու ապօրինի որսի եւ ձկնորսության դեմ:
ԱԺ նախագահի տեղակալ Վահե Էնֆիաջյանը կարեւորել է օրենքի տառին համապատասխան գործունեություն ծավալելը ցանկացած ոլորտում, ինչպես նաեւ որսորսորդության բնագավառում օրենսդրության կատարելագործումը: ԱԺ փոխնախագահի խոսքով՝ բոլոր հարցերն անհրաժեշտ է մասնագետների մասնակցությամբ համակողմանի քննարկել, գտնել լուծումներ, ապա նոր միայն որոշումներ կայացնել դրանք կյանքի կոչելու համար:
Վահե Էնֆիաջյանը որսորդներին հավաստիացրել է, որ բարձրացված խնդիրները կդասակարգվեն, կքննարկվեն եւ կներկայացվեն համապատասխան մարմիններին. որսորդական կազմակերպությունները կտեղեկացվեն արդյունքների վերաբերյալ:
Կարդացեք նաև
ՀՀ Ազգային ժողով
Հարգելիներս, լրագրողին ուղարկեք վերապատրաստման։ Առավոտից չէի սպասում նման դիլետանտություն։ Հանդիպման ժամանակ էդպիսի կարծիք չէր կարող հնչել, ուղղեք վերնագիրը։ Խոսքը գնում է սիրողական որսի մասին, Հայաստանում արդյունագործական որս չկա ու չի կարող լինել, ի՞նչ ապրուստը հոգալու մասին կարող է խոսք լինել։ Իսկ եթե լրագրողը հատուկ է սա արել, որ բացասական կարծիք ձևավորի որսորդների ու առհասարակ, սիրողական որսի նկատմամբ, դա անընդունելի է շատ ցածր։
Հարգելի Հենրիկ, վերնագիրը պաշտոնական հաղորդագրության տեքստից է, սա «Առավոտի» հեղինակային հոդվածը չէ: Եվ ամբողջ հոդվածն էլ ԱԺ պաշտոնական հաղորդագրությունն է, որի մասին հղում կա վերջում: Ահա սկզբնաղբյուրը http://www.parliament.am/news.php?cat_id=2&NewsID=11910&year=2019&month=08&day=16&lang=arm&fbclid=IwAR14PLXTv9PgzX9_O9nRXQuxGCs10PDD6rNdSyBBnm1zmLxxz4ueRzPdfPI