ՀՀ վաստակավոր նկարիչ Վլադիմիր Աբրահամյանի աշխատանքները օգոստոսի 16-ից 10 օր շարունակ հասու կլինեն արվեստասերներին: «Դալան» ցուցասրահում կբացվի նկարչի չորրորդ անհատական ցուցահանդեսը, որտեղ ներկայացված են նրա ներկապնակի ամենավառ գույները, ընդգրկված են նաև 2019 թ.-ին վրձնած աշխատանքները: Ցուցահանդեսին նաեւ նկարչի մասին պատմող ֆիլմ կցուցադրվի:
Վլադիմիր Աբրահամյանի բազմաթիվ ստեղծագործություններ գտնվում են ՀՀ տարբեր թանգարաններում, անհատական հավաքածուներում (ԱՄՆ, Ֆրանսիա, Լիբանան, Արաբական Միացյալ Էմիրություններ, Լեհաստան, Գերմանիա, Չինաստան, Ռուսաստան): Աբրահամյանը շուրջ 250 գրքերի գեղարվեստական ձևավորման հեղինակ է։
Ինչպես Aravot.am-ի հետ զրույցում նշեց ցուցահանդեսի կազմակերպիչ Նարա Եփրեմյանը, Վլադիմիր Աբրահամյանի չորրորդ անհատական ցուցահանդեսի գլխավոր առանձնահատկությունն այն է, որ ներկայացված են նրա` երբեւէ չցուցադրված աշխատանքները, շատերն էլ` 2019 թ. կտավներ: «Դրանք վառ ապացույց են, որ նկարիչը շարունակում է ստեղծագործել, ունի նոր ծրագրեր, նախաձեռնություններ, բազմաթիվ էսքիզներ, որոնք պետք է կյանքի կոչի: Ցուցահանդեսն առանձնանում է այս ամենով»,-ասաց տիկին Եփրեմյանը:
Նաեւ հավելեց, որ ցուցահանդեսի մյուս առանձնահատկությունն այն է, որ նկարիչը սովորաբար ստեղծագործում է դասական երաժշտության ներքո, որը վայելում է իր նվագարկչով եւ ձայնապնակներով: «Ցուցահանդեսի ժամանակ փորձելու ենք փոխանցել նկարչի ստեղծագործելու ամբողջ աուրան: Դրա համար «Դալան» ենք բերել նրա ձայնարկիչը եւ օպերային արվեստի լավագույն նմուշները` ձայնապնակներով: Ցուցադրության ընթացքում անընդհատ հնչելու է դասական երաժշտություն, որովհետեւ Վլադիմիր Աբրահամյանը դասական երաժշտության, մասնավորապես օպերային արվեստի մեծ սիրահար է: «Այս անգամ ընտրված է 30 նկար, հիմնականում աբստրակտ արվեստ է ներկայացվելու»,-ընդգծեց մեր զրուցակիցը:
«Գեղանկարչությունը սկսվում է այն ժամանակից, երբ բնությունը քեզ աշխարհ է բերում»,-ասում է Վլադիմիր Աբրահամյանը: Նրա խոսքերով, գյուղը` իր ողջ գեղեցկությամբ, սարերով, հողային տներով, որտեղ ինքն է ծնվել, ի սկզբանե հուշել է, թե ինքն ինչ է դառնալու:
«Ամեն մի նկար իմ զավակն է, տարբերություն չեմ դնում, թե մեկը լավն է, մյուսը` վատը…Բոլորն էլ իմ ստեղծած գործերն են…»,-հավելում է նա:
Ինչ վերաբերում է դասական երաժշտության հանդեպ սիրուն, արվեստագետն ասում է. «Փոքր ժամանակվանից ես միշտ դասական երաժշտություն եմ լսել` Մոցարտ, Չայկովսկի…Երաժշտության մեջ սյուժե կա, որ նկարը նկարում եմ, թեկուզ աշնանային, աշնան մեղեդին ես զգում եմ»:
Գոհար ՀԱԿՈԲՅԱՆ
Լուսանկարները տրամադրել է Նարա Եփրեմյանը:
