2019թ. օգոստոսի 9-ին Արցախի Հանրապետության փաստաբանների պալատի անդամ Էրիկ Բեգլարյանը ֆեյսբուք սոցիալական ցանցի իր էջում հրապարակել է մի տեսանյութ, որտեղ ներկայացվել են ազատազրկված անձ Էդուարդ Գասպարյանի նկատմամբ Արցախի Հանրապետության ոստիկանության ծառայողների կողմից խոշտանգումներ և այլ ապօրինություններ կատարելու վերաբերյալ նախկին ազատազրկված անձ Ռոման Բաբայանի պնդումները: Ըստ Ռ. Բաբայանի՝ 2016թ. փետրվարի 21-ին ԱՀ ոստիկանության քրեակատարողական հիմնարկում Է.Գասպարյանի մահը վրա է հասել նրա նկատմամբ կատարված խոշտանգումներից ու արժանապատվությունը նվաստացնող վերաբերմունքից հետո:
Ներկայացված տեսանյութի հիման վրա, հաշվի առնելով խոշտանգումների կանխարգելման իր գործառույթի կարևորությունը, ԱՀ մարդու իրավունքների պաշտպանը կայացրել է սեփական նախաձեռնությամբ քննարկման ընթացակարգ սկսելու մասին որոշում:
Պաշտպանն այնուհետև որոշումն ուղարկել է ԱՀ գլխավոր դատախազություն՝ գործի հանգամանքներն ուսումնասիրելու նպատակով: Պաշտպանը հետևողական է լինելու Ռոման Բաբայանի պնդումներին պատշաճ իրավական արձագանք ապահովելու հարցում և այդ ուղղությամբ ձեռնարկելու է օրենքով նախատեսված բոլոր միջոցները:
ԱՀ մարդու իրավունքների պաշտպանի հաղորդագրություն
