Արդարադատության նախարար Ռուստամ Բադասյանն այսօր կառավարության նիստից հետո անդրադարձավ նախարարության հեղինակած օրենսդրական նախագծին, համաձայն որի՝ սոցիալական երաշխիքներ են տրվելու Սահմանադրական դատարանի այն անդամներին, որոնք մինչեւ հոկտեմբերի 31-ը հրաժարական կներկայացնեն: Պատասխանելով լրագրողների հարցերին, թե դատավորներին օրինական կաշառք են առաջարկում, պարոն Բադասյանն ասաց, որ դա կաշառքի առաջարկ չէ, այլ՝ վաղ կենսաթոշակի սխեմա է, որը կիրառվել է շատ այլ երկրներում ու անցումային փուլի համար կիրառված միջոց է. «Ցանկացած պարագայում ՍԴ դատավորները կենսաթոշակ ստանում են, մեր առաջարկն է հրաժարականի դեպքում մինչեւ 65 տարեկանի հարցը կարգավորելը»:
Հարցին՝ թե արդյոք քաղաքական որոշո՞ւմ է նման նախագիծ ունենալը, որպեսզի ազատվեն ՍԴ գործող կազմից, պարոն Բադասյանը պատասխանեց. «Ոչ, այս ամենը բխում է ստեղծված իրավիճակից, եւ ստեղծված իրավիճակում առաջարկվող օրենսդրական լուծում է։ Նայած ինչ նկատի ունեք՝ ասելով քաղաքական որոշում։ Ցանկացած լուծում իր մեջ որոշակի քաղաքական տարր է պարունակում, դա չի նշանակում կուսակցական։ Դա նշանակում է քաղաքական որոշում, որը, բնականաբար, չի կարող դուրս գալ իրավական պետության սկզբունքների շրջանակներից»:
Կարդացեք նաև
Լրագրողները հետաքրքրվեցին՝ եթե որեւէ դատավոր չհամաձայնի գնալ թոշակի, ի՞նչ են անելու, պարոն Բադասյանը պատասխանեց. «Մեր առաջարկը սա է, երբ կլինի այդ իրավիճակը՝ նոր կմտածենք ինչ անել»:
Արդարադատության նախարարը նաեւ ասաց, որ կառավարությունն առաջիկայում կհրապարակի դատաիրավական բարեփոխումների նախագիծը, փոխգործողությունների ծրագիրը, որտեղ սահմանված կլինեն նաեւ սահմանադրական բարեփոխումների ուղղությունները: Հարցին՝ հրաժարվելո՞ւ եք սուպերվարչապետական համակարգից Բադասյանը պատասխանեց. «Երբ կհրապարակենք, փաստաթղթում կտեսնեք` ինչի համար է փոփոխվում»:
Լուսինե ԲՈՒԴԱՂՅԱՆ
